Ibarraldeko Hitza

Euskal Herria kalean zirkulazioari moztuta

Ibarraldeko Hitza — Thu, 17 May 2012 22:44:57 +0000

Biharko Merkataritzaren eguna dela eta, 10:30etik 15:00etara, Euskal Herria kaleko 1 eta 17 zenbakien arteko ibilgailuen zirkulazioa moztu egingo dute. Berastegitik datozenak txumitxatik joango dira, eta Tolosatik doazenak, Idoiagatik.

Munduko ipuinen kontaketa, astelehenean

Ibarraldeko Hitza — Thu, 17 May 2012 22:43:00 +0000

Ipuin-kontaketa saioa izango da kultur etxean, Kultur Aniztasunaren Nazioarteko Egunean, hilaren 21ean. Izaskun Mujikak Munduko ipuinak saioa eskainiko du, 18:00etan.

Ibarrako plan orokorra definitzeko prozesuari ekingo dio gaur udalak

Ibarraldeko Hitza — Thu, 17 May 2012 22:41:40 +0000

Ibarrako Udalak eginiko azken osoko bilkuran hiri antolaketarako plan orokorraren tramitazioa eteteko erabakia hartu zuen, prozedura berri baten bitartez plana zehazteko helburuarekin. Bada, «herriko lurrak nola erabili» definitzeko planaren prozesua parte hartzailea izango da, eta gaur bertan emango zaio hasiera. Izan ere, herritarrak deitu ditu udalak plan orokorra definitzeko prozesuan nola parte hartu azaltzeko. Ibarrako plazan (euria eginez gero, kultur etxean) 19:00etan elkartuko dira udal ordezkariak eta herritarrak.
Gerturatzen diren herritarrei planari buruzko informazioa biltzen duen triptiko bat banatuko diete. Ibartar guztiak gonbidatu dituzte parte hartzera.

Berrobiko kultur asteak ikuspegi zabalarekin begiratuko dio munduari

Ibarraldeko Hitza — Thu, 17 May 2012 22:27:43 +0000

Bihar hasi eta hilaren 25era arte Mundua Berrobin eta Berrobi Munduan izenburupean, kultur jarduera ugari izango dira Berrobin. Kirola, musika, azoka, dantza, gaztetxoentzako jokoak, hitzaldiak, tailerrak, antzerkiak… denetarik izango da XXII. Kultur Astearen barruan.
Bada, dena den, nabarmentzeko ekitaldi bat, udaletik azaldu dutenez, etzi, igandean izango den azoka. Bertan, goiz osoan zehar, berrobitarren produktuak izango dira, hala nola, egurra lantzen duten herritarrenak, sagardogileen sagardoa, nekazarien produktuak edota baserrietako material zaharra. Berrobitarrez gain, Euskal Herriko hainbat txokotatik etorritako artisauak izango dira azokan, Zegamatik datozen bi alemaniar, esaterako. Hauen kasuan, xaboi naturala jarriko dute euren postuan, eta haurrei xaboia nola egiten den erakusten ariko dira. 20 postu izango dira denera, eta horren guztiaren inguruan giro polita nagusituko da, beraz, Berrobiko Udaletik inguruko herritar guztiak gonbidatu dituzte.
«Munduari ikuspegi zabalarekin begiratu» nahi dio aurtengo kultur asteak. Hori adierazi nahi dute leloaren bidez, eta horren adibide da Iraken egoera ezagutzeko Karlos Zurutuza gerra kazetariaren hitzaldia. Bada, hitzaldi honetan bezala, gainerako ekitaldietan parte hartzera animatu dituzte herritarrak udaletik.

EGITARAUA
Maiatzak 19, larunbata
10:00. Suziria eta Uzturre mendira irteera, Berrobiko plazatik.
17:00. Didgeridoo (Australiako musika tresna) tailerra gaztetxean.
20:00. Didgeridoo kontzertua.
Maiatzak 20, igandea
10:00-14:00. Udaberriko merkatua: Berrobiko nahiz Euskal Herriko produktuekin, eskulanekin eta bigarren eskuko gauzekin.
Tartean. Haurrentzako xaboi naturalen tailerra, eta pintxo poteoa sagardoarekin lagunduta.
16:00. Mus txapelketa jolastokian.
17:30. Berrobiko gaztetxoen dantza emanaldia.
Maiatzak 21, astelehena
17:00. Buruhandiak, ume jolasak eta euskaraokea.
Maiatzak 22, asteartea
17:00. Gazteen pilota partidak.
19:00. Gipuzkoa Zero Zabor hitzaldia, Etxolan.
Maiatzak 23, asteazkena
17:00. Sukaldaritza erakustaldia Felix Belauntzaranekin, Bide Ona elkartean (haurrak zaintzeko zerbitzua egongo da).
19:00. Hitzaldia: Euskal Herriko independentzia ekonomikoa Oskar Arantzabalekin, Etxolan.
Maiatzak 24, osteguna
17:00. X. Literatur Lehiaketako sari banaketa, Etxolan.
Ondoren. Eskola bizia, herri bizia (eskola txikiei buruzko dokumentalaren aurrerapena).
19:00. Irak esklabu ikus-entzunezkoa, Karlos Zurutuza gerra kazetariaren eskutik.
Maiatzak 25, ostirala
17:30. Antzerkia eta musika emanaldia eskolako aretoan.

Gipuzkoa zero zabor taldearen hitzaldia, Ibarran

Ibarraldeko Hitza — Thu, 17 May 2012 17:31:40 +0000

Ibarra Zero Zabor taldeak antolatuta, Gipuzkoa zero zabor hitzaldi ematen ari da Ibarrako kultur etxean. 70 bat lagun elkartu dira hondakin bilketaren inguruko informazioa jaso asmoz. Gaikako bilketaren inguruko zalantzak argitzeko aukera dute.

«Futbol jokalari izateari uztean egin nahi nuena bete dut entrenatzaile lanetan»

Ibarraldeko Hitza — Wed, 16 May 2012 12:26:57 +0000

Zigor Aranalde Futbol entrenatzailea
Futbol jokalari izateari utzi zion duela bi denboraldi Zigor Aranaldek (Ibarra, 1973). Espainiako ligan jokatu du, eta baita Ingalaterran ere. Orain, zelaitik aulkirako pausoa eman du. Bigarren B mailan dagoen Albacete taldearen bigarren entrenatzailea da.
Nolatan Albacete taldearen bigarren entrenatzaile?
Pasa den urtean Ingalaterran aritu nintzen futbol idazkari moduan lanean. Liga irabaziz amaitu genuen, eta igo egin ginen
mailaz. Oporrak igarotzera Albacetera, emaztearen jaioterrira joan ginen. Lagun on batek Albaceten lan egiteko aukera eskaini zidan, eta onartu egin nuen. Aukera ona zen, izan ere, batetik, etxean bertan geratzen ginen, eta bestetik, futbolean lan egiten jarraitzea ahalbidetzen zidan. Beraz, Ingalaterrakoa konpondu nuen. Oso gustura geratu nintzen hartutako erabakiarekin.
Etxean geratzeari eman zenion garrantzia.
Futbolean edozein alorretan lan egitea oso gustuko dut, baina entrenatzaile bezala aritzea guztien gainetik dago une honetan niretzat. Lan honek aukera hori ematen zidan, beraz, garrantzitsua zen niretzat. Noski, familia berriro ere etxera eramatea ere garrantzitsua zen. Beraz, erabaki hori hartu genuen.
Duela bi denboraldi futbola utzi zenuenean buruan al zenuen entrenatzaile moduan aritzea?
20 urte baino gehiago egin ditut futbol jokalari. Beraz, hori uztean, konturatzen zara gauza asko utzi dituzula bidean, eta bizitza guztia futbolari eman diozula. Beraz, futbolaren inguruan edozein lan egitea zein nire ideia edo aukeretako bat. Entrenatzaile izatea futbol jokalari izatetik gertuen dagoena dela esan daiteke, eta aurtengo denboraldira arte ez zait aukera hori iritsi.
Prestaketarik egin al duzu?
Jokalari izateari utzi nionean, entrenatzaile kurtso bat egin nuen, eta kirol zuzendaritza master bat ere egin nuen. Ondo prestatu dut nire burua, nire asmoa futbolean jarraitzea baitzen.
Zer moduz ikusi duzu zure burua entrenatzailearen paperean?
Oso pozik nago. Jokalarietatik oso gertu nago, eta eurekin dudan erlazioarekin gustura nago. Hori entrenatzaile batentzat oso garrantzitsua da gogoko dut.
Ardura handiagoko postua izango da entrenatzailearena, ezta?
Jokalaria zarenean zure ardura da fisikoki ongi egotea, duzun hoberena ematea eta entrenatzaileak behar zaituenerako prest egotea. Entrenatzaileak beste ardura batzuk ditu. Partidak prestatu behar ditu, eta lan taldea kudeatu behar du. Nire kasuan, zertxobait erosoagoa da, ni bigarren entrenatzailea bainaiz.
Zeintzuk dira bigarren entrenatzailearen egitekoak?
Entrenamenduetan entrenatzailearekin egon. Bestalde, partiden ondoren, guztia grabatu egiten denez, ikusi egiten dugu berriro, akatsak atzemateko, eta ezaugarri onak azpimarratzeko. Aste osoan zehar egoten gara partidan egindakoa zuzendu nahian, jokalariekin.
Albacetera iritsi zinenean, taldea ez zegoen oso egoera onean.
Mailaz jaitsi berritan sartu nintzen taldera. Egoera ez da hoberena, beraz. Taldea berritzea egokitu zaigu. Iazko jokalarietatik bi edo hirurekin geratu gara soilik. Taldea ere berregituratu egin genuen, harrobitik hasita. Aldaketa hauek guztiekin, denboraldi txukuna egiten ari gara.
Maila berreskuratzea da aurtengo erronka.
Bai. Ahal dugun egokien egingo dugu. Bigarren A mailara igotzea lortuz gero, urte zoragarria litzateke. Orain, azken partida galdu dugun arren, play off-a jokatzeko sailkatu gara. Hemendik aurrerako partidetan, beraz, igotzea ala ez igotzea izango dugu jokoan.
Kopan aritzeko aukera ere izan duzu.
Bai. Athleticen eta Athletico Madrilen aurka jokatu genuen. Azken horien aurka irabaztea lortu genuen, baina bilbotarren aurka galdu egin genuen. Gozatu handia hartu genuen Kopako partidekin.
Egungo zein entrenatzailerekin geratzen zara?
Barcelona eta Real Madril talde onak dira, eta entrenatzaileei dagokienez, Guardiolarekin geratuko nintzateke. Taldeei dagokionez, Barcelonaz gain, aurtengo Athletic nabarmenduko nuke.
Euskal talde bat entrenatzea gustatu al litzaizuke?
Noski. Profesional mailan Eibarren hasi nintzen, eta esaterako noizbait bertan entrenatzeko aukera izatea asko gustatuko litzaidake. Eta, zer esanik ez Realean, Athleticen edota Osasunan. Gaur egun, Albaceten nago, eta oraindik ikasten ari naiz. Egunen batean posible balitz gustura egingo nuke.
Zein une gogoratzen duzu, bereziki, futbol jokalari moduan aritu zine urteetatik?
Eibarrerako saltoa oso garrantzitsua izan zen niretzat. Ibilbide osotik une bat aukeratu behar banu, Walsalle taldearekin Reading-en aurka Cardiffeko Millenium stadioan jokaturiko play offeko finala izugarria izan zen.

«Futbol jokalari izateari uztean egin nahi nuena bete dut entrenatzaile lanetan»

Ibarraldeko Hitza — Tue, 15 May 2012 15:16:27 +0000

Zigor Aranalde futbol entrenatzaileari eginiko elkarrizketaren aurrerapena:

Futbol jokalari izateari utzi zion duela bi denboraldi Zigor Aranaldek (Ibarra, 1973). Espainiako ligan jokatu du, eta baita Ingalaterran ere. Orain, zelaitik aulkirako pausoa eman du. Bigarren B mailan dagoen Albacete taldearen bigarren entrenatzailea da.
Nolatan Albacete taldearen bigarren entrenatzaile?
Pasa den urtean Ingalaterran aritu nintzen futbol idazkari moduan lanean. Liga irabaziz amaitu genuen, eta igo egin ginen
mailaz. Oporrak igarotzera Albacetera, emaztearen jaioterrira joan ginen. Lagun on batek Albaceten lan egiteko aukera eskaini zidan, eta onartu egin nuen. Aukera ona zen, izan ere, batetik, etxean bertan geratzen ginen, eta bestetik, futbolean lan egiten jarraitzea ahalbidetzen zidan. Beraz, Ingalaterrakoa konpondu nuen. Oso gustura geratu nintzen hartutako erabakiarekin.
Etxean geratzeari eman zenion garrantzia.
Futbolean edozein alorretan lan egitea oso gustuko dut, baina entrenatzaile bezala aritzea guztien gainetik dago une honetan niretzat. Lan honek aukera hori ematen zidan, beraz, garrantzitsua zen niretzat. Noski, familia berriro ere etxera eramatea ere garrantzitsua zen. Beraz, erabaki hori hartu genuen.

Ibarrako Udalak atez ateko bilketaren aldeko konpromisoa hartu du

Tolosaldeko eta Leitzaldeko Hitza — Tue, 15 May 2012 03:37:06 +0000

Ibarrako Udalak atez ateko hondakin bilketaren aldeko konpromisoa hartu du, eta hilaren 29an berretsi egingo du udaletxean egingo den bilkuran. Eredu aldaketa hori gauzatzeko, informazio kanpaina jarriko du abian udalak, eta hilaren 22an eta 23an, batzar informatiboak egingo ditu bilkura aretoan.
Bilduko udal ordezkariek erabakiaren berri iragan larunbatean eman zuten prentsaurrekoan, hainbat herritarren babesarekin. Bertan, udalak arduraz jokatu duela eta horrela jarraitu nahi dutela azaldu zuten: «gaiari aurrez aurre heltzeko eta herritarren kezkak argitzeko».
Hondakinen gaiak herritarren artean kezka sortu duela onartu zuen Jesus Peñagarikano alkateak: «Jakin badakigu erabaki honek eta gaia kutsatzeko sortu dituzten informazio interesatuek kezka, urduritasuna eta zalantza sortu dutela jendartean. Hau guztia oso normala eta ulerkorra da, eta orain gure zeregina da kezka eta zalantza horiek argitzea».
Udal ordezkarien esanetan, «gizarteak ulertu du hondakinekin arazo bat dugula, eta guk sortutako arazoa denez, konponbidea ematea gure esku dago. Horregatik, ahalik eta gehien birziklatze aldera, emaitza onenak lortzen dituen hiri hondakinen bilketaren alde egiteko konpromisoa hartu nahi dugu; sistema hori atez ateko bilketa da, %80ko birziklatze maila lortzen ari den sistema bakarra».
Edukiontzien sistemaren inguruan, datuen errealitatea jarri nahi izan zuten mahai gainean Ibarrako Udaleko kideek: «Urteak daramatzagu edukiontzien sistemarekin, eta urratsak eman baditugu ere, sistema honek ematen dituen emaitzak oso kaxkarrak dira. Gure birziklatze maila ez da %30era iristen, hondakinen %90a birziklagarria denean. Denok birziklatzen dugula esaten dugu, baina datuak gordinak dira: hondakinen %70 inguru zabortegira botatzen ari gara, urtero 180.000 euro inguru. Gure axolagabekeriarengatik, balio handia duten eta lehengai diren hondakinak zabor kutsatzaile bihurtzen ari gara eta hau onartezina da! Atez ateko sistemarekin alderatuta, egungo sistemarekin errefus kopurua hirukoiztu egiten da. Kutsatzea ez da eskubidea eta sinestarazten digun kontsumo eredua aldatu nahi dugu».
Herritarrei lasaitasun mezua ere bidali nahi izan zien alkateak: «Herritar guztiei lasaitasuna eta ilusioa transmititu nahi diegu, eta duela urtebete gugan jarri zuten konfiantza mantentzen jarrai dezatela eskatu».

Egitaraua
Maiatzak 22, asteartea
19:00etan. Batzak informatiboa euskaraz udaletxeko bilkura aretoan.
Maiatzak 23, asteazkena
19:00etan. Batzak informatiboa gazteleraz udaletxeko bilkura aretoan.
Maiatzak 29, asteartea
Atez ateko bilketa bilkuran onartuko du udalak.
Ekaina
Usurbilera bisita gidatua. Eguna zehazteko dago oraindik.
Iraila
Parte hartze prozesuaren barruan, auzoz auzo bilerak egingo dituzte.

Ibarrako Udalak atez ateko hondakin bilketaren aldeko apustua egin du

Ibarraldeko Hitza — Sat, 12 May 2012 10:59:33 +0000

Ibarrako Udalak hondakinekin gaur egun dagoen “arazoa” konpontze aldera, “emaitza onenak lortzen dituen hiri hondakinen bilketaren alde egiteko konpromisoa” hartu duela azaldu du gaur eguerdian, prentsaurrean. “Sistema hori atez ateko bilketa da, %80ko birziklatze maila lorzen ari den sistema bakarra”, azaldu dute udal arduradunek.

“Ibarra ere zero zabor norabidean jarri nahi dugu, pausu txiki batekin emaitza ezin hobeak lortuz. Egungo norabide bakarreko sistema linealaren aurrean (sortu-erabili-desegin), sistema zirkularra proposatzen dugu, Europako zuzentarauak ezartzen duen hondakinen tratamendurako hierarkia errespetatuz, hau da, hondakinak murrizteko, berrerabiltzeko eta birziklatzeko urratsak emango ditugu”, gaineratu dute.

Elduain herria zeharkatuz

Ibarraldeko Hitza — Fri, 11 May 2012 13:49:24 +0000

Ibarratik Berastegira doan errepidea jarraitzen baldin badugu, bidearen erdian Elduainekin egiten dugu topo. Herri sarreran, autobus geltoki bat dago, eta bertatik hasiko dugu txangoa. Ibilaldia kasu honetan itzulia denez, irteera eta amaiera puntua herri sarreran kokatuko ditugu.
Herri gunetik Sales baserrirako joan-etorria laburra eta erraza da: bizikletan 10 minutu, korrika 15 eta oinez ordu erdi. Gauzak lasai hartzea, beraz, gozamenarentzat aberasgarria izango da.
Autobus geltokian burua alde batera eta bestera mugitzen baldin badugu, ezkerraldean Leitzarango autobia ikusiko dugu, aurrealdean eliza eta udaletxea, eta eskuinaldean gure ibilbidea.
Beherantz abiatuko gara, Corenso Tolosana enpresarantz. XIX. mendean Elduaingo jarduera ekonomiko nagusia burdinolek osatzen zuten: Ollokiegi, Inturia eta Berinez-ek. Harrez gero, jarduera nagusiak baso ustiapena, abeltzaintza, nekazaritza eta paper eta kimika industria bilakatu ziren. Azken honen adierazle nagusia da Corenso Tolosana. Bertara doan errepidean, bi etxebizitzako txaletak eta baserri batzuk ikusiko ditugu. Elduainen 227 biztanle bizi dira, azken erroldaren arabera; 25,2 kilometroko zabalera dauka, eta itsasoaren maila kontuan hartuta, 260 metroko altueran dago. Herriguneko enpresa handia igaro ondoren, eskuinera hartuko dugu. Bidegurutzen artean galtzea ez da zaila, baina nora goazen ikustea erraza denez, erreferentzia bezala errekaren beste aldean dagoen behi haztegia hartuko dugu. Bertara iristeko, beheko erreka zeharkatu behar da. Horretarako zubia dago, eta pasabidea hasten den lekuan errepideko galipota amaitzen da. Pista ez da oso luzea, hain justu, behi haztegian amaitzen baita.
Galipotarekin topo egiten dugunean, zalantza piztuko zaigu, agian. Eskuinera edo ezkerrera egingo dugu orain? Aurrean dugun bailarako azken baserria aurkitu behar dugunez, eskuinera egingo dugu. Haztegiaren ondotik pasatzean, bigarren bidegurutzearekin egingo dugu topo, denbora gutxian. Kasu honetan, ezkerreko bide laua hartuko dugu. Hainbat baserri eder ikusiko ditugu aurrean, zelai berde ederrez inguraturik. Erreka txiki baten laguntza ere izango dugu, Sales baserrirako bidean.
Sales baserria auzo txiki honetako azken baserria da, eta errepidea eta pista uztartzen diren lekuan aurkitzen da. Paisaia zoragarria dauka aurrealdean: basoz jantzitako orma ikusgarria. Pistan aurrera eginez gero, Larte mendira iristen da mendizalea, hori bai, malda benetan gogorrak igo ondoren.
Kasu honetan, joan-etorri laburra eta lasaia egiteko asmoa dugunez, Sales baserrira iristean buelta hartuko dugu. Errekatxoa oraingoan eskuin aldean geldituko da, eta ezkerrean… garai batean arropak garbitzeko erabiliko zuten aska topatuko dugu; atseden hartzeko benetan leku egokia.
Ibilbidearen erdia egitean, etorritako bidetik joango gara. Enpresa ondora iristean, ezkerrera egin beharrean aurrera jarraituko dugu maldan gora. Bide honetatik elizara iritsiko gara. Eskuinean futbol zelaia eta pilotalekua daude. Eskaileretan gora egiten baldin badugu, errepidera irtengo gara. Ezkerretan, udaletxea eta Kontzeju Taberna daude: freskagarri edo garagardo fresko bat hartzeko garaia da, beraz.
Errepidean behera egiten baldin badugu, berriro ere herri sarrerako autobus geltokira iritsiko gara, hau da, ibilbidearen amaiera puntura. Autobusaren ordutegia begiratu, eta zerbitzu publikoaren zain geldituko gara bertan. Autostop egin nahi duenak ere, erraz aurkituko du Tolosara eramango duen autoa, teorian bai behintzat.