Ibarraldeko Hitza

Munduko sokatira txapelketaren txanda iritsi da

Tolosaldeko eta Leitzaldeko Hitza — Mon, 20 Feb 2012 02:10:08 +0000

Ibarrako sokatira taldeak, Eskozian jokatuko den goma gaineko 8X8ko Munduko Txapelketan parte hartuko du, ostegunean eta ostiralean. Euskal Herriko txapelketan bezala, pisuaren arabera, hainbat mailatan lehiatuko dira ibartarrak Perth-en (Eskozia).
Bidaia, ordea, hilaren 22an hasiko da, goizean goiz, Ibarrako plazan. 04:00ak inguruan, autobusez Bilbora abiatuko dira 31 lagun. Hauetatik 26 tiralariak izango dira. Espedizioa, entrenatzaile, koordinatzaile eta senideek osatuko dute. 07:00ak aldera, Bilbon hegazkina hartuko dute ibartarrek, Alemaniako Frankfurt hirira iristeko. Hemendik, Edinburgorako hegaldia hartuko dute. Eskoziara iritsi orduko, Munduko txapelketa jokatzen den hirira joango dira, 14:00etan pisaketak hasiko baitira.
Anjel San Roman ibartarren entrenatzailea da. Bere esanetan, asteazkenean egiten den pisaketa horrek, txapelketa guztirako balioko du.
Kluben arteko lehia ostegunean hasiko da, ostiralean amaitzeko. Ondorengo bi egunetan, larunbatean eta igandean, herrialdeen arteko munduko txapelketa jokatuko da. Hego Euskal Herriko tiralariek Espainia ez ordezkatzea erabaki dute, ondorioz, ez da Espainiarik egongo lehian.
Munduko txapelketaren lehen tiraldiak hilaren 23an hasiko dira, 10:30ean. Gizonezkoek 560 kilotan ekingo diote lehiari. Emakumezkoek 11:00etan helduko diote sokari, 540 kilotan. Goizean bertan jakingo da garaileak nortzuk diren. Bazkaldu ondoren, 14:30ean, gizonezkoen 640 kilokoa eta 23 urte azpikoa jokatuko dira. Lehen dominak ostegunean banatuko dira, eta tiralariak, galdu ala irabazi, Hotelerako bidea hartuko dute.
Ostiralean kluben arteko txapelketaren bigarren eta azken eguna jokatuko da. 10:30ean, gizonezkoak 600 kilokoan ariko dira, eta 11:00etan, emakumezkoak 500ekoan. Arratsaldean 680 kilokoa jokatuko da gizonen artean, baina Ibarrak ez du talderik aurkeztuko. Pisu honetan bakarrik egingo dute kale eskualdeko tiralariek, beste maila guztietan hartuko baitute parte. Azken tiraldiak, misto mailakoak izango dira. Neska eta mutilez osatutako bi talde aurkeztuko ditu Ibarrak, eta maila polita emateko esperantzaz aurkitzen dira, gainera.
Eugenio Lopetegi Ibarrako taldearen koordinatzailea da. Bere esanetan, dominaren bat irabazteko aukerak egon badaude. Anjel San Roman entrenatzailea bat dator irakurketa honekin. «Neskek aurten zorte txarra izan dute lesioekin, hala eta guztiz ere gogotsu joango dira Eskoziara. Mistoan talde politak osatuko ditugu, eta mutilen kasuan ikusi egin beharko da, ea dominaren bat lortzen duten», dio Lopetegik. Munduko txapelketa izanagatik, Euskal Herriko taldeen maila altua dela uste du ibartarren entrenatzaileak, baina aurkarien maila jakitea zaila dela ere onartzen du: «Irlandatik, Ingalaterratik, Eskoziatik, Txinatik, Mongoliatik, Hego Afrikatik… etorriko dira taldeak. Azken munduko txapelketa duela bi urte jokatu zen Italian. Ibartarrak hasi berriak ziren orduan, eta begira nolako gorakada izan duten bi urte hauetan. Gainontzekoekin ere berdina gertatuko zen».
Munduko txapelketa bat jokatzeko aukerak, bere gastuak ere izaten ditu. Sokatiratik ez direnez bizi, bidaia eta egonaldia finantzatzeko, ibartarrek ate ugari jo behar izan dituzte. Eskoziako txapelketara joateko, urte guztian zehar aritu dira dirua biltzen: txosnak jarriz edo poltsikotik ordainduz. Ibarrako udalaren eta Kirolgiren ekarpena ere izan dutela diote taldeko arduradunek.

Mirian Elorza: «Ez dugu dominen aukera burutik kendu nahi»
Eskoziakoa bigarren munduko txapelketa izango da Mirian Elorzarentzat (Tolosa, 1981). Duela bi urte, Italian, Sakanarekin brontzezko domina lortu zuen. Perth-en 540 kilotan, 500 kilotan eta mistoan ariko da.
Bigarren munduko txapelketa da zuretzat.
Hori da, duela bi urte Onintza Iraolarekin batera Sakanakoekin aritu ginen, eta brontzezkoa lortu genuen.
Eta aurten?
Ez daukagu buruan, baina aldi berean, ez dugu burutik kendu nahi aukera hori.
Nola aurkitzen da taldea?
Urtea oso gustura hasi genuen, hamabi neska elkartu ginelako. Gero, urtero bezala, lesioak edo lana tarteko, bakantzen joan da taldea. Nahiko justu ibiliko garela uste dut, aldaketak egiteko aukera handiegirik ez dugulako izango. Hala eta guztiz ere, esperantzarekin goaz, ahal dugun hobekien egiteko asmoz.
Euskal Herriko txapelketan, hirugarren postuaren inguruan ibili zarete, Badaiotz eta Sakanarekin borrokan. Berriro ere Eskozian aurkituko dituzue.
Hirugarren postua nahiko seguru izan dugu Euskal Herri mailan, bigarrenarekin borrokan. Perth-en edozer gerta daitekeela uste dut.
Gainontzeko aurkariak nola ikusten dituzu?
Italian gertatu zen bezala, gogorrenak Txina Taipeikoak izango direla uste dut.
Mistoan aukerak dituzuela diote?
Entrenamenduetan eta, mistoan zerbait egin daitekeela ikusi dugu. 4X4ko txapelketetan, maila polita eman du Ibarrak, eta zortziko elegante batekin zerbait egin daitekeela uste dut.

Asier Lizarburu eta Iurgi Iturbe:«Gure adinekoen maila nolakoa den ikusi nahi dugu»
Ibarra taldeko gazteenetakoak Asier Lizarburu eta Iurgi Iturbe ibartarrak dira. Biek 17 urte dituzte. 23 urte azpiko taldean ariko dira lehian, eta gero, pisuaren eta entrenatzailearen arabera, aukeraren bat edo beste izan dezakete. Biek argi dute Eskoziara ikastera doazela.
Urduri aurkitzen al zarete aukera honen aurrean?
Asier Lizarburu: Oraingoz sentsazio onekin nago. Esperientzia hartzera goaz txapelketara, eta hemendik kanpo sokatira nola dagoen ikustera.
Iurgi Iturbe: Euskal Herrikoa pixka bat ezagutzen dugu, eta orain kanpokoa ikusi nahi dugu, ea nola tiratzen duten eta gure adinekoek nolako maila duten, ikasten jarraitzeko.
Munduko txapelketari buruz, taldeko beteranoek zer esan dizuete?
A. L.: Lander Oterminekin hitz egiten aritu gara, eta oso gogorra dela esan digu. Tiraldi asko izaten dira egun batean eta amaierarako gogorra izaten dela.
Etxean edo lagunek, nola hartu zuten albistea?
I. I.: Harritua baina ondo. Lagunek ere antzera, «sokatiran munduko txapelketarik ba al dago ba?», galdetzen zizuten.

Hobariak eta salbuespenak izango dira udalaren hainbat tasatan

Ibarraldeko Hitza — Sun, 19 Feb 2012 07:58:07 +0000

Ibarrako Udalak adierazi duenez, hobariak eta kenketak izango dira udaleko hainbat tasa eta zergetan familia ugarientzako edota lanbidearteko gutxieneko soldata baino gutxiagoko diru sarrerak dituztenentzako.
2012. urterako indarrean dagoen lanbidearteko gutxieneko soldata (641,40 euro) baino gutxiagoko diru sarrerak egiaztatzen dituzten pertsonak, esaterako, salbuetsita daude zabor bilketagatiko tasa ordaintzetik, eta
uraren kontsumoagatiko eta estolderia erabiltzeagatiko tasan hobaria izango dute. Famili unitatetzat hartuko dira, etxebizitza berean bizi, eta beren artean nolabaiteko harremana duten pertsonak, eta famili unitatearen kide guztiek Ibarrako erroldan egon behar dira.
Kasu honetan, eskaerarekin batera nortasun agiria, familia unitatearen kide guztien diru sarreren ziurtagiria, 2011eko uraren ordainagiriak eta zabor bilketagatiko ordainagiria aurkeztu beharko dira.
Bestalde, familia ugariek 2012 urteari dagokion Ondasun Higiezinen gaineko zergan %50eko hobaria izango dute. Kasu honetan, zergaren familia ugariko titular izan eta baldintza hori justifikatu dezaketen subjektu pasiboei aplikatuko zaie hobaria.
Bi kasuetan eskaerak aurkezteko epea irekita dago, martxoaren 7a izango delarik azken eguna. Ibarrako Gizarte Zerbitzuen sailean egin beharko da.

Xabi Fernandez, zazpitik bost

Ibarraldeko Hitza — Sun, 19 Feb 2012 03:59:02 +0000

Volvo Ocean Race estropadan Xabi Fernandezen ontziak bosgarren garaipena lortu du Txinako uretan. Guztira zazpi etapa jokatu dira, eta Telefonicak bost irabazi ditu. Sailkapen nagusian lehen postuan aurkitzen dira, sendo, 114 puntutatik 111 eskuratuta. Laugarren etapa luzea, tartean laburrak jokatzen baitira, bihar hasiko da. Sanyatik (Txina) abiatuko dira, Aucklandera (Zeelanda Berria) iristeko asmoz. Horretarako, 5220 itsas miliako ibilbidea egin beharko dute.

Bost milioi euroko aurrekontua onartu du Ibarrako Udalbatzak

Ibarraldeko Hitza — Wed, 15 Feb 2012 11:17:30 +0000

Atzo eginiko osoko bilkuran 2012. urterako aurrekontua onartu zen Bilduko zinegotzien aldeko bozkekin. 5.086.000 euroko aurrekontua izango du, bada, Udalak, pasa den urtean baino 500.000 euro gutxiago. 2010eko datuei erreparatuz gero, berriz, 6.961.500 euroko aurrekontua zuen Udalak urte hartan. Bi urtetan ia bi milioi murriztu da, beraz, aurrekontu orokorra.

Inbertsioetara bideratutako gastua da nabarmendu beharrekoa, bikoiztu egiten baitu iazko kopurua. Jexux Peñagarikano alkateak adierazi bezala, “igoera, hein handi batean, erabilera anitzeko eraikuntzaren lanek sorturikoa da”. Izan ere, 1.089.257 da inbertsioetarako erabiliko den kopurua, eta 780.000 euro bideratzea aurreikusi da Beheko Biden altxatzen ari diren eraikuntzaren obretarako. Kopuru horretatik, 178.000 euro da Udalak bere gain hartuko duena, eta Eusko Jaurlaritzatik 512.000 euro jasoko dira proiektu horretarako.

Uholdeek eragindako kalteek sorturiko gastua ere nabarmendu du Ibarrako alkateak. Hain zuzen ere, 143.000 euro bideratuko dituzte Izaskun auzoan euriteen ondorioz baserriko bideetan izandako kalteak konpontzeko. Uzturpe ikastolako patioa berritzeko, bestalde, 60.000 euro aurreikusi dituzte, eta hori ere azpimarratu nahi izan zuten atzo eginiko bilkuran.

Aurrekontuko gainerako gastuei dagokienez, pertsonal gastua 1.437.192 eurokoa da, iazkoa baino 100.000 euro gehiago, eta gastu arrunta 1.858.110 eurokoa, 100.000 euro gutxiago. Udalaren transferentziak edo diru laguntzak, berriz, 520.868 euro izango direla aurreikusten dute, iaz baino 70.000 euro gutxiago, eta 2010eko aurreikusitakoaren erdia.

Balioanitzeko etxebizitza sozialen tarifa

Bestalde, atzo eginiko osoko bilkuran onartu eta gero, balioanitzeko etxebizitza sozialek tarifa izango dute aurrerantzean. 65 urte baino gehiagoko hartzaileek 150 euro ordainduko dute hilean banakako logelarengatik, eta 65 urtetik beherakoek, berriz, 180 ordainduko dute.

Atez ateko zabor bilketa
PSE-EEren zinegotziak atez ateko zabor bilketaren inguruko mozioa aurkeztu zuen atzoko osoko bilkuran eztabaidatua izan zedin. Mozioaren arabera, atez ateko sistema «zikinagoa, deserosoagoa eta garestiagoa da». EAJren aldeko bi bozka eta Bilduren aurkako zortzi izan zituen mozioak. Bilduren arabera, «garbiagoa da, bi orduz baino ez baita egoten zaborra kalean, ohiturak aldatzea baino ez du eskatzen, eta dauden sistemetan merkeena da; gainera, hondakina murriztu eta birziklapena areagotzeko sistemarik eraginkorrena da».

Sektore publikoaren erreformaren aurka
Bestalde, Bilduk aurkezturiko Espainiako Gobernuak ezarri duen sektore publikoaren erreformaren aurkako mozioa ere onartu du Udalbatzak. Era berean, jaioberrien bidegabeko jabetze edo adopzio irregularrei buruzko mozioa onartu da, kaltetuei elkartasuna adieraziz, eta sahararren
aldarrikapenen alde Tolosaldea Sahararekin elkarteak aurkezturiko mozioa ere onartu du Ibarrako Udalbatzak.

Aranalde eta bere kideei elkartasuna azaltzeko Poitiersera joan dira

Tolosaldeko eta Leitzaldeko Hitza — Wed, 15 Feb 2012 03:34:30 +0000

Maite Aranalde euskal presoa Poitierseko espetxean aurkitzen da, Frantzian, Euskal Herritik 550 kilometrora. Larunbatean, Ibarratik hainbat herritar bertara joan ziren, Aranalde eta bere kideek bizi duten egoera bertatik bertara salatzeko asmoz. Ibartarrekin batera, Abadiño, Eskoriatza eta Berangoko jendea ere espetxe kanpoan elkartu zen, 100 lagun inguru, barnean zituzten herritarrei elkartasuna azaltzeko.
Poitiersen lau euskal herritar aurkitzen dira preso. Bertara joan ziren euskal herritarren esanetan, «espetxe zuzendaritzak euskal preso politikoei zigor sistematikoa ezartzen die Poitiersen: bisitarik eta patiorik gabe uzten dituzte, eta Mittard-a deituriko isolatzeak eguneroko ogi dira bertan».
Espetxearen kanpo aldean egindako elkarretaratzean, neurri hauekin amaitzeko eskatu zuten. Horretarako, txalaparta, musika, suziriak… eraman zituzten Poitiersera. 40 puzgarri ere airera bota zituzten, hogei banderola zintzilik zituztela. Hauetako bat espetxeko orman gelditu zen zintzilik, eta bertan egon zen bi ordu luzez, funtzionario batek kendu zuen arte.
Bestalde, Aranalderen sendiak azaldu duenez, ibartarrak bere iloba jaioberria ezagutzeko aukera izan zuen larunbat goizeko bisitan.

Erosteagatik sarituak

Ibarraldeko Hitza — Tue, 14 Feb 2012 23:01:51 +0000

Iragan astean egin zuten Ibarrako merkatarien elkarteko Gabonetako zozketaren sarin banaketa. Hiru sari zozketatu dira: 300 euro, 200 euro eta 100 euroko txekeak elkarteko dendetan erosteko. 200 euroko txekearen irabazlea agertu ez denez saria eman gabe geratu da. Manoli Berasategi (300 euro) eta Gema Jauregi (100 euro), biak ibartarrak, lortu dituzte beste bi txekeak. Sari banaketan merkatarien elkarteko ordezkari batek banatu zizkien sariak. Bi irabazleak «oso pozik» agertu dira, eta kutixiren bat erosteko erabiliko dutela txekea azaldu dute. hitza

Euskal Herria Eguna antolatzeko batzarra

Ibarraldeko Hitza — Tue, 14 Feb 2012 14:26:38 +0000

Algortan irailean egingo duten Euskal Herria Eguna antolatzeko bilera izango da martxoaren 10ean. Bilera honetara senidetuta dauden Ibarrako, Lizarrako eta Algortako elkarteak eta herritarrak daude deituta. Goizean batzarra egingo dute, eta ondoren, Hernanin bazkalduko dute sagardotegian. Parte hartzeko Subegin eman beharko da izena.

Mikel Goñi pilotariak frontoiak betetzen jarraitzen duela erakutsi du

Tolosaldeko eta Leitzaldeko Hitza — Tue, 14 Feb 2012 06:13:55 +0000

Alperrak koadrilako kideak eta Aitor Esnaola euskal presoaren lagunak oso gustura zeuden larunbatean, jai ederra antolatu baitzuten Ibarrako pilotalekuan. Alde batetik, frontoia txiki gelditu zen, eta bestetik, kirol mailan, tanto ederrak, azken unera arte emozioa, eta Mikel Goñiren erakustaldia.
Aurkariak, Iñaki Errazkin eta Julen Urruzola, ez ziren motz gelditu. Maila bikaina erakutsi zuten, eta Goñi II.a benetan estu hartu zuten. Partida irabazteko aukera ere izan zuten, baina azkenean, profesionalak irabazi zuen: 22-21.
Belabieta pilotalekuan gertatu zena ikusi ondoren, antolatzaileek eskerrak eman nahi izan dizkie ikusleei, bertara joateagatik, eta pilotariei, emandako ikuskizunagatik. Guztira, 500 lagun baino gehiago elkartu ziren frontoian, haur nahiz heldu, eta denek gozatu zuten.
Pilotariak ere «gustura» aritu eta gelditu ziren. Mikel Goñik, aurkarien maila azpimarratu zuen, biren aurka jokatzea beti zaila izaten dela gogoratuaz.
Errazkin eta Urruzola irribarre handi batekin sartu ziren aldageletara, nahiz eta partida galdu. Eurentzat «esperientzia oso polita» izan zela esan zuten, «profesional izandako baten aurka jokatzea beti baita polita». Urruzola asteasuarraren esanetan, «kosta egin zaigu hasieran partidan sartzea: urduritasuna, ezagunak… baina behin izardia botatzen hasi garenean, gustura ibili gara». Errazkin tolosarrak Oronozkoaren «indarra» azpimarratu zuen: «Mikel Goñiren ezaugarriren bat esan beharko banu, hori indarra da. Pilota izugarrizko abiaduran mugitzen du».

Elkarrizketa- Mikel Goñi
«Maite nautela ikusi dut, eta hori benetan eskertzekoa da»

Jendearekin argazkiak ateratzen egon ondoren, partidaz hitz egin zuen Mikel Goñik (Oronoz, 1977).
Zer moduzko bizipena izan da?
Giroa izugarrizkoa izan da, frontoia beteta baitzegoen. Nahiz eta hotz handia egin jendea etorri egin da, eta horrek poz handia ematen du. Bertako bi pilotari egoteak ere, giro izugarria jartzen du. Nire aldetik, ez da erraza biren aurka jokatzea. Beraiek oso ongi moldatu direla uste dut; hasieran ni nahasten saiatu dira, baina azkenean, zorte pixka batekin, partidari buelta emateko aukera izan dut.
Partida oso lehiatua izan da.
Biren aurka jokatzen dudanean, tentsio handia sentitzen dut, eta horrek asko nekatzen nau. Bi biren aurka jokatu izan bagenu, agian, partida politagoa izango zen, baina erritmo handian jokatu dugu eta gustura. Errazkinen tanto politak egin ditu, eta baita pilota zailak eraman ere. Urruzola, berriz, nabari da pilotan ibiltzen dela. Ez dute nolanahiko bikotea osatzen.
Eta ikusleak?
Bertako bi gazte egoteak giroa asko berotzen du, eta gero, herri honetan maite nautela ere ikusi dut, eta hori eskertzekoa da. Adin guztietako ikusleak etorri dira, haurretatik hasi eta aiton-amonetaraino. Denok uste dut, arratsalde polita pasatu dugula, eta jendea etxera gustura joan dela.
Zer moduzko frontoia da Ibarrakoa?
Herriko jaietan partida politak antolatu daitezke. Pilotarekin asmatuz gero, lehia politak ikus daitezke bertan. Frontoiak utzi egiten du jokatzen, eta baxua denez, aurrean joko polita sor daiteke.

Manipulados del Araxes lantegiko langileen egoera salatu dute ELAk eta LABek

Ibarraldeko Hitza — Mon, 13 Feb 2012 16:33:46 +0000

Lizartzako Manipulados del Araxes lantegiko zuzendaritzak bost langile kaleratzeko erabakia hartu du, eta «hori eta langileen egungo egoera orokorra salatzeko» ELA eta LAB sindikatuek deituta elkarretaratzea egin dute Tolosako Trianguloan.
Bi sindikatuek adierazitakoaren arabera, Lizartzako lantegiak dituen 14 langiletik 5 kaleratzeko erabakia hartu du zuzendaritzak. «Azken hamabost hilabeteetan lan erregulazio txostena aurkeztuta, egoera honetan egon da lantegia, eta kaleratzeak burutu ostean, gainontzeko langileek lan erregulazio txostenaren pean jarraituko dute, zuzendaritzaren asmoak betetzen badira», azaldu dute sindikatuek.
Manipulados del Araxes urte luzeetan grafikagintzara dedikatu den enpresa da. «Urte oparoak izan direnean irabazi horiek ez dira bertako langileen artean banatu, eta orain, garai okerragoetan, langileok gara kaltetuenak», adierazi dute ELAk eta LABek. Azaldu dutenez, «lan kargaren jaitsierarengatik» azken urteetan «arazoak» izan ditu. Halaber, Amarotz paper fabrikarekin estuki lotuta egon izan da azkenaldian, eta honen itxieraren ondorioz, «egoera are eta larriagoa» bihurtu da. Sindikatuen ustez, «lantegiak ez du beste alternatibarik landu eta horrek azken hilabeteetan langileak lan erregulazio txostenean egotea eragin du, eta orain, hainbeste urtetan bertan lanean aritu diren bost langile kale gorrian geratzeko arriskua dago zuzendaritzaren erabakiz».
Bi sindikatuek diotenez, langileek krisiaren aitzakipean hamaika eraso jasan dituzte azken urteotan, eta eskualdea ez da horretatik kanpo geratu. «Irabaziak gutxi batzuen eskuetan metatzea helburu duen kapitalismoak bere horretan jarraitzen du: beraiek sorturiko krisian murgildurik, krisitik ateratzeko sisteman sakontzea dakarten irtenbideak proposatu eta elikatuz. Horra hor, Zapatero jaunaren erreformak eta bere ondorioak eta orain Raxoiren erreforma eta asmoak, besteak beste». Euren ustez, krisitik ateratzea «langileen esku» dago. «Gure indarrak bilduz, aberastasun banaketan oinarrituriko eredua bultzatuz, kalera atera eta gure ahotsa entzuteko unea da».
«Langile guztiek dakite»
Manipulados del Araxes lantegiko zuzendaritzak bere aldetik, «beste hainbat lantegitan dauden egoera berean» aurkitzen direla adierazi du. «Langile guztiek euren postuetan jarraitzea gustatuko litzaiguke, baina egoerak erabaki hau hartzera bultzatzen gaitu. Langile guztiak jakinaren gainean daude, eta egoera ulertu dute, eta ez dute kontrako iritzirik azaldu. Gainera, gurean ordezkaritza duen ELA ere konforme azaldu da eurekin izan dugun bileretan», azaldu dute.

Gutxigatik irabazi du partida Mikel Goñik

Ibarraldeko Hitza — Mon, 13 Feb 2012 12:21:26 +0000

Larunbatean Mikel Goñi pilotari Nafarrak pilota partida jokatu zuen Ibarrako pilotalekuan. Iñaki Errazkin eta Julen Urruzola bikotearen aurka aritu zen nor baino nor, eta 22. tantora iristea lortu zuen. Tolosaldeko bikoteak 21 tanto egin zituen.

Pilotalekua bete egin zen hiru pilotarien arteko lehia ikusteko.