Ibarraldeko Hitza » Orexa

Gazteak protagonista kultur hamabostaldian

Ibarraldeko Hitza — Sat, 29 Oct 2011 17:35:20 +0000

Gaztetxoenak izan dira protagonista nagusi gaurkoan Orexako kultur hamabostaldian. Eurentzako puzgarriak jarri dituzte arratsaldean, eta gozatu ederra hartu dute beraien gainean saltoka. Gainera, txokolatea ere prestatu dute herritarrek, bai txikientzat, bai eta nahi zuen ororentzat ere. Biharkoan, tradizio handia duen Uitzi-Orexa ibilaldia egingo dute, eta ondoren herri bazkaria egingo dute denek elkarrekin.

Bi astez kulturaz blai

Ibarraldeko Hitza — Wed, 26 Oct 2011 15:52:32 +0000

Gaur ekingi dio Udalak urtero antolatzen duen kultur hamabostaldiak. Datozen egunetan, eta izenari men eginez, bi asteko iraupenarekin kultur ekitaldiz beteriko egitarauaz gozatzeko aukera izango da. Hitzaldietatik hasi, eta txango eta herri bazkarietara, denetarik izango da, adin guztiei zuzendua, gainera.
Tradizio handiena duen ekimena Orexa eta Uitziren artean egin ohi duten ibilaldia izaten da. Aurtengoa 24.a da, eta ohi bezala, Uitzitik Orexara etorriko dira, eta Orexan bertan bazkarian bilduko dira denak. Urriaren 30ean izango da, eta hamabost egunen buruan, gauza bera egingo dute, baina alderantziz, hau da, Orexatik Uitzira.
Hitzaldi eta antzerkiek lekua izango dute egitarauan, eta baita ikus-entzunezkoek ere. Aurtengoan, zine mutua eskainiko dute: «gaur egun ez dago aukera handirik horrelako zinema ikusteko, beraz, zine mutua ematea erabaki dugu, garai zaharrak oroitze aldera», azaldu dute udaletik.
Bazkari edo afarien aitzakian maiz bilduko dira herritarrak kultur hamabostaldian. Hala, talo afaria egingo dute «batez ere jende heldua erakartzeko». Gaztain jatea ere bai, aurrez mendi ibilaldian gaztainak jasota. Azken egunean egingo dute herri afaria, eta bertarako txartelak azaroaren 2a baino lehen eskuratu ahalko dira tabernan. 130-140 lagun bildu ohi dira urtero afarian, eta honen ondoren festa giroa izaten da, musikak lagundurik. «Azken batean, Kultur Hamabostaldiak jai ukitua ere badu; helburu nagusia herriko jendea elkartzea izaten da».

Kultur hamabostaldia
Egitaraua
Urriak 28, ostirala. 19:00etan, talo afaria; ondoren, bideo emanaldia: zinema mutua.
Urriak 29, larunbata. 16:00etan puzgarriak eta txokolatea gaztetxoentzat; 22:30ean, antzerkia: Ogiyik karri etzun semia (Txirene antzerki taldea).
Urriak 30, igandea. 09:00etan, XXIV. Uitzi-Orexa ibilaldia; 14:00etan, herri bazkaria, Irati, Ane eta Joxe Leonen kantaldiak alaiturik.
Azaroak 1, asteartea. 16:30ean mendi irteera gaztainak bilduz; ondoren, gaztain jatea.
Azaroak 2, asteazkena. 19:30ean, hitzaldi didaktikoa sagardogintzari buruz, Gillermo Castaños etnologoarekin (Gipuzkoako sagardogileen elkartea).
Azaroak 4, ostirala. 20:00etan, euskal musikari buruzko saio didaktikoa, O+Hatz taldearen eskutik.
Azaroak 5, larunbata. 21:00etan, herri afaria; 00:00etan, Ai Ene erromeri taldea; ondoren, Dj Txok

«Herria suspertzea eta bizirik mantentzea da lehentasun nagusia»

Ibarraldeko Hitza — Thu, 28 Jul 2011 10:27:31 +0000

Eneko Maioz (Donostia, 1984) «gogotsu» dago herriaren alde lan egiteko. Ez dauka beldurrik, Orexa herri aktiboa da eta jendea lanerako prest dago; gainera, taldearen laguntza osoa ere badu. Orexan herritarrez osatutako zerrenda bakarra aurkeztu zen; bost zinegotzi daude, eta bostak Bilduk eskuratu zituen.
Dagoeneko aste batzuk daramatzazue udalean sartuta. Zer moduz egokitu zara lan berrira?
Pixkanaka-pixkanaka ari gara erritmoa hartzen. Kostata, baina, gustura. Eguneroko erritmoa hartu behar da. Bilera asko dauzkagu, gauza asko, eta batzuetan ez dakizu oso ondo zeini eman lehentasuna eta zeini ez, baina pixkanaka ari gara hori ere ikasten.
Nolatan animatu zinen?
Herritarren artean talde bat osatu genuen. Alkatearen irudia korapilatsua izaten da, eta azkenean nik aurrerapausoa ematea erabaki nuen. Taldea ikusita, banekien lagunduko zidatela eta animatu egin nintzen.
Herritarrez osatutako zerrenda bakarra izan zineten, emaitzen zer balorazio egiten duzu?
Oso ondo. Herritarron zerrenda bakarra izan arren, jende asko joan zen botatzera, normalean baino gehixeago. Gainera, zerrenda irekiak ziren, eta oso ondo azaldu behar izan genien dena herritarrei. Hori dena kontutan hartuta, oso balorazio ona, ezin gara kexatu.
Esan duzun bezala, zuen zerrendak irekiak ziren eta pertsonak bozkatzen ziren zerrendak bozkatu beharrean?
Bai, pertsona botatu behar zen. PPko zerrenda ere egotean jendeari dena ondo azaldu behar zitzaion. Bost zinegotzi ziren, baina, zerrendako lau bakarrik aukeratu behar ziren. Orduan, denek lehenengo lauak aukeratzen bazituzten, eta PPk bi lortzen bazituen, zinegotzia lortzen zuen. Hori dena azaldu behar izan genien herritarrei, eta azkenean dena espero bezala atera zen.
Udala zer egoeratan aurkitu duzue?
Ondo, alde horretatik zortea daukagu guk. Aurretik udalean egondakoekin harreman ona daukagu. Eta, horrek lana asko errazten digu. Guk jarraipen bat egin behar dugu, eta gure ildoa pixka bat markatu behar dugu. Baina, aurretik lan asko eginda daukagu. Orain ere horretan ari gara, martxan dauden gauzei jarraipena ematen, eta aldi berean, aurrerapauso batzuk ematen.
Martxan dauden proiektu horiekin jarraitzeko asmoa daukazue, beraz?
Bai, proiektu horiekin ari gara martxa hartzen. Laguntza batzuk eta zintzilik dauzkagu, eta martxan dauden proiektu horiek aurten itxi nahi ditugu. Oraingoz, proiektu horiekin jarraitzeko asmoa dugu.
Zein izango dira hurrengo lau urteetako proiektuak?
Proiektu asko dauzkagu, baina gauzak sortu ere egiten dira. Adibidez, ostatu itxi egin da, eta orain lehentasuna taberna da. Bestalde, ume asko dauzkagu herrian, eta gai horretan zerbait gehiago planteatzea pentsatu behar dugu. Herriko negozioak ere lagundu nahi ditugu: taberna, kooperatiba… Azkenean, herria pixka bat suspertzea eta bizirik mantentzea da lehentasun nagusia.
Orexa oso herri aktiboa da.
Bai, alde horretatik oso erraza daukagu. Jendeak parte hartzen du. Gaur daukagu lehenengo herri bilera, eta espero dugu jende askok parte hartzea bertan. Jendea gogotsu dago. Herriak ondo erantzun du.
Orduan, parte hartzea bultzatuko duzue?
Parte hartzea betidanik egon da, Orexan. Herri bileren sistema aspalditik dator, eta horrek asko laguntzen digu guri. Ez da udaletxeak zer pentsatu duen bakarrik, askotan kanpotik gauzak beste modu batera ikusten dira. Gainera, jendea prest dago lan egiteko eta laguntzeko.

Ikasturte amaierako yoga saioa

Ibarraldeko Hitza — Wed, 08 Jun 2011 17:39:35 +0000

Urtean zehar, Gaztelu eta Orexako herrietan, yoga ikastaroak jaso dituzte. Ikasturteari amaiera emateko, Gaztelun yoga saio bat egin zuten bi herrietako ikasleek. Horren ondoren afaria egin zuten elkarrekin Erroizpe Azpiko kirol eta kultur elkartean.

Ibarraldeko herritarrek bozka emateko aukera dute jada

Ibarraldeko Hitza — Sun, 22 May 2011 07:00:11 +0000

Oraintxe ireki dituzte ere Ibarraldeko herrietako hauteslekuak. 20:00ak arte egongo da udal eta foru hauteskundeetan bozkatzeko aukera. Hauek dira herriz herri aurkeztu diren alderdien zerrenda:

Belauntza: PP, PSE-EE, Belauntza Berreginez, eta Denok Bat.

Berastegi: PP, PSE-EE eta Bildu.

Berrobi: PP, PSE-EE, Giroa eta Bildu.

Elduain: PP eta Bildu.

Gaztelu: PP, Udaberri Taldea, eta Bildu.

Ibarra: PP, PSE-EE, EAJ, Bildu eta Hamaikabat.

Leaburu: PP, Bildu, eta Bide Berriak.

Lizartza: Bildu, Ertza eta PP.

Orexa: PP eta Bildu.

Amaitu dira Santa Krutzak

Ibarraldeko Hitza — Wed, 04 May 2011 08:27:33 +0000

Atzo, oilarraren igoerarekin eman zieten amaiera Orexan Santa Krutzei. Asteasuko Elizmendi auzoan igandean amaitu zituzten ospakizunak, baina Orexan Santa Krutz eguna ospatu ondoren amaitu zituzten herriko festak.
Dianarekin eman zioten hasiera egunari. 11:00etan herritar guztiak adi jarri ondoren, 13:00etan auzoen arteko apustua egin zuten pilotalekuan. Bertan hiru auzotako hiru bikotek jokatu zituzten pilota partidak. Jende asko hurbildu zen pilota auzoen arteko partidak ikustera. Amaitu ondoren, pintxo lehiaketa bat egin zuten, herriko pintxorik onenak norenak ziren erabakitzeko. Arratsaldean, herriko neskak mutilen aurka aritu ziren tokan eta sokasaltoan. Hala ere, gauza on guztiei bezala, Orexako jaiei ere iritsi zaie amaiera, eta 19:00etan oilarra igo ondoren amaitu zituzten aurtengo festak. Ziur jada 2012ko Santa Krutz iristeko desiratzen dagoela bat baino gehiago.

Oilarra jaitsita, orexarrak festa giroan

Ibarraldeko Hitza — Sat, 30 Apr 2011 17:41:17 +0000

Ostiralean hasi zituzten orexarrek jaiak oilarraren jaitsierarekin. Gaur, larunbata, umeak izan dira nagusi arratsaldeko jai giroan. Lehenik eta behin ume jolasak egin dituzte, eta ondoren, merienda ederra egin dute, haur eta gurasoek. Herri afaria egingo dute 21:00etan, eta ondoren, Imuntzo eta Beloki trikitilariak ariko dira giro alaitzen.

Hauen saioa amaitzean, Dj Bullen txanda izango da. Goizaldera, baratzuri zopa izango da goizeko ordu txikiak arte irauten dutenentzat.

MAIATZAK 1, IGANDEA
18:00. Aizkolariak: Jesus Mari Mujika eta Iñaki Azurmendi.
Ondoren. Sagardo dastatzea egingo dute, Lizartzako ISK & BILLA txarangak alaiturik.
20:00. Bertso saioa Unai Iturriaga, Uxue Alberdi, Unai Agirre eta Jesus Mari Irazu bertsolariekin.

MAIATZAK 3, ASTEARTEA, Santa Krutz eguna
11:00. Diana.
13:00. Auzoen arteko apustua egingo dute.
14:00. Pintxo onenak aukeratuko dituzte pintxo lehiaketan.
17:00. Neskak mutilen aurka ariko dira tokan eta sokasaltoan.
19:00. Festei amaiera emango diete oilarraren igoerarekin.

Candanchura eskiatzera joateko aukera bikaina

Ibarraldeko Hitza — Wed, 02 Mar 2011 17:05:13 +0000

Belauntza, Orexa eta Leaburuko udalek eskiatzera joateko irteera antolatu dute martxoaren 18tik 20ra bitarte. Izena emateko epea hilaren 7an amaituko da. Candanchura autobusez joango dira. Ostiral iluntzean abiatu eta igande arratsaldean itzuliko dira. Ostatua bertako Aguilas aterpetxean hartuko dute. Aterpetxe hau eskiatzeko pisten ondoan dago. Irteerarako lehentasuna Uli Mankomunitateko herritarrek izango dute. Belauntzako, Leaburuko eta Orexako herritarrek 110 euro ordaindu beharko dituzte irteerara joateko, eta gainontzekoek 135 euro ordaindu beharko dituzte. Prezioaren barnean sartzen dira gosariak, bazkariak eta larunbateko afaria. Baita forfaita eta asegurua ere. Norbaitek ez badu eskiatu behar 25 euro gutxiago ordaindu beharko ditu. Pertsona bakoitzak bere materiala eman dezake edo han alokatu dezake. Izena emateko aipatu udaletara deitu behar da.

Haur eta gaztetxoen begirale izateko lan poltsa osatzen ari dira

Ibarraldeko Hitza — Wed, 02 Mar 2011 17:01:14 +0000

Aurtengo Aste Santu eta Gabonetako ludotekarako zein uztaileko udaleku irekietarako, aisialdirako begiraleen lan poltsa osatzeko jendea behar dute Uli Mankomunitateko herriek, hau da, Belauntzak, Leaburu-Txaramak, Gazteluk eta Orexak. Eskaerak aurkezteko epea otsailaren 28an ireki zen eta hilaren 18an amaituko da. Belauntza, Leaburu-Txarama eta Gaztelun informazioa eta dokumentuak udaletxean eskuragarri egongo dira. Orexarako telefonoz edo emailez kontaktatu behar da.
Bete beharreko baldintzak
Lan poltsa honetan parte hartzeko zenbait baldintza bete beharko dira. 18 urte beteta izan beharko ditu edo deialdia egin den urtean zehar bete beharko ditu begiraleak. Euskara menperatu behar du, bai ahoz eta baita idatziz ere. Merezimenduei dagokienez, ez da titulazio berezirik eskatzen, baina begirale titulua edukitzea edo begirale ikastaroa egiten aritzea, edo/eta Hezkuntza edo Gizarte gaiekin zerikusia duten ikasketak izatea baloratuko dira. Baita begirale lanetan izandako esperientzia ere.
Uli Mankomunitateko gazteek, herriko haur eta gaztetxoekin lan egin eta lan munduan murgiltzeko aukera bikaina izan dezakete begirale lanetan.

Kontsu tabernaren urteurrenean “gogotsu”

Ibarraldeko Hitza — Tue, 18 Jan 2011 15:29:27 +0000

2009ko abenduan berrireki zuen Orexako Kontsu taberna Nereo Cantero azpeitiarrak. Azken urte honetako balorazioa egiterakoan «positiboa» dela dio, eta orokorrean «gustura» dago izandako harrerarekin.
Taberna denbora luzez itxita egon zenez, «berriro martxa hartzea kosta» egiten dela dio Nereo Canterok. Hala ere, noiz behinka jendea ea irekita dagoen galdezka etortzen zaio, eta pixkanaka pixkanaka Tolosaldeko jendea ere berrezagutzen ari da Orexako Kontsu taberna.
Nereo Cantero bera da Kontsu tabernaz arduratzen dena, hala ere, asteburuetan laguntzatxo bat izaten du eta bere emazteak sukaldean laguntzen dio. Beraz, familiartean darama taberna azpeitiarrak.
Asteburuetan beti ere, «mugimendu gehiago egoten da». Kanpoko jende gehiago gerturatzen omen da ostatura, eta herrikoak ere asteburutan gehiago mugitzen omen dira.

Ordutegia

Taberna ia aste guztian egoten da irekita. Astelehenetan eta asteartetan atseden eguna izaten duen arren, asteazkenetik igandera bitarte irekita egoten da. Gainera, egun guztian zehar egoten da zabalik, eta edozein ordutan joanda ere beti izaten da zerbait jateko aukera.

Jan faltarik ez
Kontsu tabernan astean zehar ez dute eguneko otordurik izaten, baina Nereo Canterok dio jan gabe ez dela inor gelditzen. Asteburuetan ogitartekoak eta karta txiki bat izaten dituzte aukeran.
Janari dagokionez «betiko jana» izaten dute aukera moduan otorduetan. Normalean aukeran izaten dituzte entsaladak, arrai zopa, piper beteak, txipiroiak, bakailaoa plantxan etab. Hemendik aurrera, eskaintza bereziak egiten hasi nahi Canterok. Eskualdean hain ezagunak diren babarrun jateak eskaintzea gustatuko litzaioke, garaian garaiko produktuak erabiliz. Arkume errea ere eskaintzen hasteko asmoa dauka.
Menu hauek nahi izanez gero, aurretik erreserba egin beharko litzateke tabernako telefono zenbakira deituz. Era berean, taberna berrian telefonoa ere aldatudute. Beraz, erreserba egin nahi izanez gero 943 68 22 90 telefonora deitu behar da, orain. Horrez gain, senitarteko bazkariak, kuadrilen afariak, agur-afariak edota mota ezberdinetako ospakizunetarako otorduak antolatzeko prest dago arduraduna. Horrelakoetan, berarekin telefonoz hitz egin eta antolatzea da. Bestalde, eguneroko otorduak ere egin daitezke Kontsu tabernan. Aste guztian zehar, baita asteburuetan ere, bazkariak zein hamaiketakoak egin daitezke bertan, mendi buelta bat eman ondoren, adibidez. Nereo Canterok inor gosez ez geratzea, eta jendea «gustura» gelditzea nahi du.Hori baita berriz ere jendea gerturatzeko modurik onena.Berarentzat garrantzitsuena bertaratzen den jendea pozik eta hurrengo baterako gogoz uztea da.Orexa eskualdeko herririk lasaienetako bat dela esan daiteke. Horregatik, leku paregabea izan daiteke arratsalde lasai bat familia giroan pasatzeko. Herritik gertu mendi buelta politak egin daitezke, eta herrian bertan frontoiaz edo jarri berri duten rokodromoaz gozatzekoaukera dago.
Jada ez dago aitzakiarik Orexara arratsalde pasa ez joateko, ikusi bezala aukera ezberdinak eta politak ematen baititu.

Orexa herri txikia den arren, bizi handia du. Horrelako herri batean beharrezko da herritarrek eurek bizitasuna ematea herriari.
Hala ere, orexarrak ez daude geldirik eta ekitaldi ezberdinak antolatu ohi dituzte. Horren adibide, asteburu honetarako antolatu duten diapositiba erakustaldia.
Juan Mari Iriondo herritarra eta bere lagunak Mongoliara joan zirela eta, hilaren 22an 20:00etan diapositiba erakustaldi bat antolatu dute herritar guztientzat, ganbaran. Ondoren, herriko tabernan afaria izango dute. Izena taberna eta soziedadean eman daitezke. Tabernara telefonoz deitu daiteke izen emateko. 20 euroko menua eskeiniko zaie joaten direnei.
Beraz, Orexako herriak berriz ere bizi gehiago emango dion betiko taberna zabalik duela. Nereo Cantero eta bere familia jendea esku zabalik hartzeko prest dago, horren erakuslek berak dioena «jendea animatzen bada, gu hemen egongo gara».