Ibarraldeko Hitza » Lizartza

Manipulados del Araxes lantegiko langileen egoera salatu dute ELAk eta LABek

Ibarraldeko Hitza — Mon, 13 Feb 2012 16:33:46 +0000

Lizartzako Manipulados del Araxes lantegiko zuzendaritzak bost langile kaleratzeko erabakia hartu du, eta «hori eta langileen egungo egoera orokorra salatzeko» ELA eta LAB sindikatuek deituta elkarretaratzea egin dute Tolosako Trianguloan.
Bi sindikatuek adierazitakoaren arabera, Lizartzako lantegiak dituen 14 langiletik 5 kaleratzeko erabakia hartu du zuzendaritzak. «Azken hamabost hilabeteetan lan erregulazio txostena aurkeztuta, egoera honetan egon da lantegia, eta kaleratzeak burutu ostean, gainontzeko langileek lan erregulazio txostenaren pean jarraituko dute, zuzendaritzaren asmoak betetzen badira», azaldu dute sindikatuek.
Manipulados del Araxes urte luzeetan grafikagintzara dedikatu den enpresa da. «Urte oparoak izan direnean irabazi horiek ez dira bertako langileen artean banatu, eta orain, garai okerragoetan, langileok gara kaltetuenak», adierazi dute ELAk eta LABek. Azaldu dutenez, «lan kargaren jaitsierarengatik» azken urteetan «arazoak» izan ditu. Halaber, Amarotz paper fabrikarekin estuki lotuta egon izan da azkenaldian, eta honen itxieraren ondorioz, «egoera are eta larriagoa» bihurtu da. Sindikatuen ustez, «lantegiak ez du beste alternatibarik landu eta horrek azken hilabeteetan langileak lan erregulazio txostenean egotea eragin du, eta orain, hainbeste urtetan bertan lanean aritu diren bost langile kale gorrian geratzeko arriskua dago zuzendaritzaren erabakiz».
Bi sindikatuek diotenez, langileek krisiaren aitzakipean hamaika eraso jasan dituzte azken urteotan, eta eskualdea ez da horretatik kanpo geratu. «Irabaziak gutxi batzuen eskuetan metatzea helburu duen kapitalismoak bere horretan jarraitzen du: beraiek sorturiko krisian murgildurik, krisitik ateratzeko sisteman sakontzea dakarten irtenbideak proposatu eta elikatuz. Horra hor, Zapatero jaunaren erreformak eta bere ondorioak eta orain Raxoiren erreforma eta asmoak, besteak beste». Euren ustez, krisitik ateratzea «langileen esku» dago. «Gure indarrak bilduz, aberastasun banaketan oinarrituriko eredua bultzatuz, kalera atera eta gure ahotsa entzuteko unea da».
«Langile guztiek dakite»
Manipulados del Araxes lantegiko zuzendaritzak bere aldetik, «beste hainbat lantegitan dauden egoera berean» aurkitzen direla adierazi du. «Langile guztiek euren postuetan jarraitzea gustatuko litzaiguke, baina egoerak erabaki hau hartzera bultzatzen gaitu. Langile guztiak jakinaren gainean daude, eta egoera ulertu dute, eta ez dute kontrako iritzirik azaldu. Gainera, gurean ordezkaritza duen ELA ere konforme azaldu da eurekin izan dugun bileretan», azaldu dute.

Kaleak alaituz inauterietan dabiltza, Berastegin eta Lizartzan

Ibarraldeko Hitza — Sat, 11 Feb 2012 18:46:35 +0000

Berastegi eta Lizartzara iritsi dira inauteriak. Tolosakoei aurre hartuta, dagoeneko mozorroak atera dituzte kalera.

Berastegin, txikienek mozorroak jantzi eta dantza emanaldia egin dute. Ondoren, txokolate beroa hartu dute. 19:00etatik aurrera triki-poteoa, eta eguna bukatzeko afaria izango dute.

Lizartzan goizean goiz hasi dira baserri eta kaleak girotzen. Gorputza mugituz, hotzari aurre egin diote. Besteak beste, bazkaria egin dute frontoian. Bihar ere inauteri eguna izango dute. Hamaiketakoa, dantza saioa, bazkaria herriko pilotalekuan, txaranga jokoak,… izango dituzte. Bukaera 20:30ean emango diote ijitoa errez.

Manipulados del Araxes enpresak bost langile kaleratu nahi dituela salatu dute sindikatuek

Ibarraldeko Hitza — Fri, 10 Feb 2012 18:10:51 +0000

ELA eta LAB sindikatuek Lizartzako Manipulados del Araxes enpresako zuzendaritzak 14 langiletik 5 kaleratzeko erabakia hartu duela salatu dute, 15 hilabete EREan egon ostean. “Gainontzeko langileek EREan jarraituko dute zuzendaritzaren asmoak betetzen badira”, esan dute sindikatuek.

Manipulados del Araxes urte luzeetan grafikagintzara dedikatu den enpresa da. “Urte oparoak izan direnean irabazi horiek ez dira bertako langileen artean banatu, eta orain, garai okerragoetan, langileok gara kaltetuenak”, diote sindikatuek. Hauek gaineratu dutenez, azken urteetan arazoak izan ditu enpresak lan karga jaitsieragatik, izan ere, Amaroz Paper Fabrikarekin esturik lotuta egon izan da azkenaldian. “Enpresak ez du beste alternatibarik landu eta horrek azken hilabeteetan langileak EREan egotea eragin du”, diote. “Amaroz-en itxieraren ondorioz egoera are eta larriagoa bihurtu da enpresarentzat. Orain, hainbeste urtetan bertan lanean aritu diren 5 langile kale gorrian geratzeko arriskua dago zuzendaritzaren erabakiz”.

Langileek krisiaren aitzakiapean “hamaika eraso” jasan dituztela azken urteotan esan dute sindikatuek, eta eskualdea ez dela horretatik kanpo geratu. “Irabaziak gutxi batzuen eskuetan metatzea helburu duen kapitalismoak bere horretan jarraitzen du, beraiek sorturiko krisian murgildurik, krisitik ateratzeko sisteman sakontzea dakarten irtenbideak proposatu eta elikatuz: horra hor Zapatero jaunaren erreformak eta bere ondorioak eta orain Raxoiren erreforma eta asmoak besteak beste”.

ELA eta LAB sindikatuek Manipulados del Araxes enpresako langileen egoera salatzeko elkarretaratzea egingo dute Tolosako Trianguloan, astelehenean, 17.00etan.

Inauteriak izango dituzte Berastegin eta Lizartzan, asteburu honetan

Ibarraldeko Hitza — Wed, 08 Feb 2012 23:01:08 +0000

Leitzakoak izan ziren goiztiarrenak, eta euren lekukoa aresoarrek hartu zuten. Orain, Berastegi eta Lizartzaren txanda heldu da. Tolosan Inauteriak gertu direla iragartzen duten kaldereroak ospatuko dituzten bitartean, berastegiarrak eta lizartzarrak mozorroen festan murgilduko dira asteburuan.
Lizartzan, dena den, iragan asteburuan ere izan zen zer ospatua. Izan ere, inauterien hasieraz ohartarazten duen diana etzi entzungo den arren, pasa den larunbatean urteroko antzerkiaz eta Otsolar dantza taldearen emanaldiaz gozatzeko aukera izan zuten herritarrek. Hain zuzen ere, Lizartzan jazotako gertakizun bat irudikatu nahi izaten dute antzerkiaren bidez. Txekorra apustuan jarri zuten karta jokoaren bidez, eta eztabaida txiki bat izan ostean, epaileak herritar guztien artean txekor jatea egitea erabaki zuen arazoa konpontze aldera. Istorio horixe antzezten dute herritarrek, eta horren ondotik, etorri ohi da herriko dantzarien saioa.
Bada, asteburu honetan, festarekin jarraituz, puske-biltzeak, txantxoak, gurdiak, Lizartzako Inaute dantzak… eta ijitoa izango dira, besteen artean.
Berastegin, inauterien itzulera
Aldin kultur elkarteak 2004an berreskuratu zuen inauteriak Berastegin ospatzeko ohitura. Lau urtetan egin zuten mozorroen jaia, baina «jendearen erantzuna gutxitzen joan zenez», azken hiru urteetan, ez dute inauteririk izan. Aurten, ordea, Urepele gazte elkarteak eta Udalak elkarlanean antolatuta, festa izango da berriro ere herrian. «Eratu berri den Urepele elkarteko batzorde berriak eta bertako kultur taldeak udaletxean proposamena egin zuen, eta horrela erabaki zen berriz ere antolatzea», azaldu du Amaia Azkue zinegotziak.
Bihar eta etzi ospatuko dituzte inauteriak, baina etzikoa izango da egun handia. Herri afaria eta ondorengo festa dira ekitaldi nagusiak. Badirudi herritarrak festarako irrikaz daudela, afarian, esaterako, 114 lagun izango baitira. Antolatzaileek antolakuntzan herritarrek eskainitako laguntzen eskertu nahi izan dute.

Hasi da festa Lizartzan

Ibarraldeko Hitza — Sat, 04 Feb 2012 14:09:07 +0000

Ekin diete inauteriei Lizartzan. Duela urte asko jazotako gertakari bat gogoratuz hasten dituzte jaiak urtero. Txekor bat jokoan jarri zuten musean, eta antza tranpa egin zuten jabeen aurkakoek. Eztabaidari irtenbidea emate aldera, epaileak txekorra herri osoarentzat banatzea erabaki zuen, txekor jate batean. Pasadizo horixe da, hain zuzen eguerdian egin duten antzerkian irudikatzen dutena.

Antzerkiaren ostean, Otsolar dantza taldearen emanaldiaz gozatzeko aukera ere izan da. Lizartzako adin guztietako herritarrek parte hartu dute dantza saioan.

Inauteriei hasiera emango diete, larunbatean

Tolosaldeko eta Leitzaldeko Hitza — Thu, 02 Feb 2012 04:00:41 +0000

Nahiz eta hurrengo asteburuan izan ekitaldi nagusienak, etzi emango diete hasiera Inauteriei. 12:00etan gibela janez hasiko dira, eta udal ordezkariak eta txekorra plazan izango dira. Ondoren, antzerkia eta Otsolar dantza taldea izango dira.

Pilota eskola berria aurkezten

Tolosaldeko eta Leitzaldeko Hitza — Tue, 17 Jan 2012 08:52:45 +0000

Lizartzako Pilota Eskola aurkeztu zuten urtarrilaren 8an, Mikel Olaetxea eta Nagore Arozena pilotarien eskutik. Lehenik, herriko frontoian eskolako 20 pilotariren arteko 10 lehia jokatu ziren. Ondoren eskola berriko kamisetak jantzi zituzten. Hauetan agertzen den irudia, Juan XXIII.a eskolak antolatutako lehiaketatik irten da, eta irabazleak Manex Malkorra eta Alaitz Azpiroz izan ziren. Topaketari amaiera emateko hamaiketakoa egin zuten guztiek, giro ederrean.

Kultur aste oparoa

Ibarraldeko Hitza — Sat, 03 Dec 2011 17:57:49 +0000

Kultur astea izan dute Lizartzan hamaika ekitaldirekin. Hitzaldiak, proiekzioak, haurrentzako tailerrak, antzerkiak eta ipuin kontaketak. Gaur gauean, gitarra eta ahots-fantasiaren euskal kanten inguruan kontzertua izango da kultur gunean, eta gauerdian Margot taldearen kontzertua izango dute gaztetxean. Bihar, igandea, berriz, kultur astearekin bukatzeko, 19:00etan, ‘Ispilua’ antzezlana izango da, kultur gunean. Kultura batzordetik ekintzek izan duten parte hartze “haundia” nabarmendu dute.

Nafarroako konkistaz hitzaldia

Ibarraldeko Hitza — Tue, 29 Nov 2011 17:56:56 +0000

Lizartzako kultur astearen barruan, hitzaldia izango da hilaren 30ean, 20:00etan, kultur gunean. Nafarroako konkista 500 urte, arabar, bizkaitar eta gipuzkoarren parte hartzea hitzaldia izango da, Nafarroa bizirik taldearen eskutik. Abenduaren 1ean, berriz, umeentzat tailerrak egingo dituzte, 17:00etan hasita, kultur gunean, eta 20:00etan, Mongoliako mendietan barrena proiekzioa izango da Josu Perezen eskutik leku berean, kultur gunean.

«Zero zabor izatera iristea da gure helburua»

Ibarraldeko Hitza — Tue, 29 Nov 2011 08:30:16 +0000

Andoni Agirre, Gipuzkoa Zero Zaborreko kidea

Lizartzako Kultur Astean, gaur, 20:00etan Zaborra: guk sortu, guk kudeatu hitzaldia izango da kultur gunean; Gipuzkoa Zero Zaborreko taldeko kideak etorriko dira hitzaldia ematera. Zaborraren eboluzioa eta arazoak azalduko dituzte. Zaborraren inguruan interesa duen edonork bertara joateko aukera izango du.
Zaborraren gaia pil-pilean dago. Zer da hitzaldian azalduko duzuena?
Gaur egun zaborrarekin ditugun arazoak azalduko ditugu. Zabortegiak gainezka ditugu, eta Europako aginduarekin 2015. urterako itxita egon behar dira. Honen aurrean planteatzen diren alternatibak aurkeztuko ditugu. Orain artean erabili diren sistemen berri ere emango dugu, hau da, hasiera batean kalean uzten zen zaborra; gero, edukiontziak iritsi ziren; atzetik, kolore ezberdinetakoak,… Zaborraren garapena azalduko dugu, eta orain zabortegiak gainezka daudenean, Gipuzkoarako zein alternatiba planteatzen diren azalduko ditugu.
Bosgarren edukiontzia edo atez atekoaz ariko zarete?
Ez gara bi modu horietan zentratuko, eta ez dugu konparaketarik egingo. Modu bakoitzak zer dakarren azalduko dugu. Batzuek zabortegiari erraustegia jartzen diote alternatiba bezala, eta beste batzuok, zabortegien eta erraustegien aurrean, asko birziklatzea jartzen dugu. Asko birziklatuz gero, ez dago zabortegi edo erraustegien beharrik, ez behintzat orain artean ezagutzen ditugun tamainakoak bezalakoak.
Zer da Zero Zabor filosofia?
Zero Zabor mundu mailako mugimendua da. Lehenengoa, erosketak egiterakoan zaborra murriztea, eta gero, zabor guztia birziklagarri izatea litzateke. Hitzak dioen moduan, zero zabor izatera iristea izango litzateke helburua, eta horretarako bidea bilatzea.