Ibarraldeko Hitza » Leaburu

Auto bat irauli da Leaburun

Ibarraldeko Hitza — Fri, 03 Feb 2012 08:50:15 +0000

Gaur 08:30ak inguruan auto bat irauli da Leaburun, Gi-3881 errepideko 2. kilometroan. Herrizaingo sailak esan duenez, istripuan ume bat zauritu da, eta Asucion klinikara eraman dute

Anjel Arrospide eta Ugaitz Mugertza finalerdietara pasa dira

Ibarraldeko Hitza — Mon, 23 Jan 2012 23:30:43 +0000

Urretxun jokatu zuten igandean Urrezko Aizkorako kanporaketa. Lopezen eta Erasunen aurka jokatu eta gero, Arrospide eta Mugertza II.ak lortu dute finalerdietarako txartela.
45 ontzako enborra, kana erdiko bat zutik, bi enbor 45 ontzakoak, 45 ontzako bat zutik, bi 60 ontzako eta sei kana erdiko erdibitu behar izan zituzten bi bikoteek. Lan guzti horiek bukatzen lehenak leaburuarra eta mutrikuarra izan ziren, eta lan bikaina egin zuten garaipena eskuratzeko.
Gipuzkoarrek, 19 minutu eta 28 segundotan geratu zuten denbora, eta Lopezek eta Erasunek osatutako bikote nafarrak, 21 minutu eta 10 segundo behar izan zituen lan guztiak bukatzeko.

Maria Albizu Irizar zoriondu du udalak

Ibarraldeko Hitza — Sat, 14 Jan 2012 16:07:04 +0000

Gazteluko alkateak, Mikel Bellosok, Maria Albizu Irizar bizilaguna zoriondu du gaur goizean, udalaren izenean. Izan ere, Albizuk 103 urte betetzen ditu gaur. Umoretsu hartu du alkatea, eta sasoi betean dagoela eta burua argi duela erakutsi du. Albizu Leaburun jaio zen, baina ezkontzean Gaztelura joan zen bizitzera.

Urtearen hasiera mendian, eta saski eta guzti

Ibarraldeko Hitza — Thu, 05 Jan 2012 17:36:20 +0000

Euskal herritar askok bezala, Leaburu-Txaramako herritarrek urtea mendira joanez hasi zuten. Urtero bezala, zenbait herritar, aurten ere, Erroxpe mendira igo ziren. Bertan hamaiketakoa egin zuten, eta euskal presoak ere gogoan izan zituzten. Bestetik, Leaburu-Txaramako Udalak herritarrei Gabonak zoriondu eta eskerrak emateko Lurlaneko produktuez osatutako saski bat zozketatu du Leaburuko eta Txaramako etxe guztien artean. Horretarako, Leaburuko eta Txaramako etxe bakoitzari bost zenbaki eman zitzaizkion. Zenbaki saritua urtarrilaren 2ko ONCE loteriko azken hiru zenbakiak zituena izan zen, 868 zenbakia, hain zuzen. Leaburuko Ermitalde Etxeak zuen zenbaki hori. Herenegun eman zion Luisa Uzkudun Leaburuko alkateak zenbaki saritua zuen Ermitaldeko Mari Ugartemendiari saria.

Amondarain eta Alkorta nagusitu dira Txaraman

Ibarraldeko Hitza — Wed, 04 Jan 2012 18:21:38 +0000

Euskal Herriko Mus Txapelketaren kanporaketak jokatzen ari dira eskualdeko herrietan. Ostiralean, Leaburu-Txaramako herritarrek azken honetako elkartean jokatu zuten. Iban Amondarain Uriartek eta Luis Mari Alkorta Uriartek osatutako bikotea izan onena, finala eurek irabazi baitzuten. Kanporaketari zegozkion sariez gain, hurrengo fasera sailkatzeko txartela eskuratu zuten.
Herrietako kanporaketa gainditzen duten bikoteek, herrialdekoan jokatzen dute, eta zazpi lehia hauek, otsailaren 24, 25 eta 26ean izango dira. Finalerako pasea, aldiz, herrialde bakoitzetik gutxieneko ordezkaritza batek lortuko du. Gainerako bikoteak parte hartzearen arabera finkatuko direla azaldu dute antolatzaileek.

Udalak saski bat zozketatuko du urtarrilaren 2an, herritar guztien artean

Ibarraldeko Hitza — Thu, 29 Dec 2011 17:29:47 +0000

Urte berria saski eta guzti hasi ahalko du Leaburu-Txaramako familiaren batek. Izan ere, udalaren eskutik, saski baten zozketa egingo dute urtarrilaren 2an. Ekimen honekin, udalak, nolabait «eskertza» adierazi nahi die herritarrei. Herritar bakoitzak zenbaki bat izango du, eta ONCE itxuen elkarteko zozketako zenbaki irabazlearen azken hiru zenbakidunak jasoko du saskia.

Leaburu-Txaramari dagokion Mus Txapelketa hilaren 30ean egingo dute

Tolosaldeko eta Leitzaldeko Hitza — Fri, 23 Dec 2011 09:37:33 +0000

Euskal Herriko Mus Txapelketa herriz-herri jokatzen ari da, Bai Euskal Herriarik antolatuta. Leaburu-Txaramari dagokion kanporaketa, hilaren 30ean, ostiralean, jokatuko da. Txaramako elkartean 21:30ean elkartuko dira, lehia jokatzeko. Bikote bakoitzak 20 euro ordaindu beharko ditu, eta sari “potoloak” egongo direla azaldu dute antolatzaileek.

‘Izarren argia’ filma gaur, kultur etxean

Ibarraldeko Hitza — Fri, 18 Nov 2011 12:26:20 +0000

Izarren argia filma izango da gaur, ostirala, ikusgai Txaramako Kultur Etxean. 18:00etatik aurrera emango dute. 1938an Saturrarango emakumeen kartzelan Espainiako Gerra Zibilean gertatutako ankerkeriak biltzen ditu pelikulan Mikel Rueda zuzendari bilbotarrak. Barbara Goenaga alkizarrak eta Erik Probanza tolosarrak hartzen dute parte.

Ostiralean ez da kultur etxea zabalik izango

Ibarraldeko Hitza — Wed, 16 Nov 2011 17:06:28 +0000

Udaletik azaldu dutenez, ostiralean, hilaren 18an, ez dute zabalduko kultur etxea. Hain zuzen ere, igandean, hau da, hilaren 20an Espainiako Gorte Orokorretarako hauteskundeak izango dira, eta kultur etxea bozkatzeko gune bezala erabiliko dutenez, ezingo dute zabaldu.

Uholdeen kaltetuekin bilera, gaur arratsaldean

Ibarraldeko Hitza — Wed, 09 Nov 2011 17:15:15 +0000

Uholdeen kaltetuekin bilera egingo dute gaur, Leaburuko udaleko ordezkariek. 19:30ean izango da, udaletxeko batzar aretoan.