Ibarraldeko Hitza » Gaztelu

Maria Albizu Irizar zoriondu du udalak

Ibarraldeko Hitza — Sat, 14 Jan 2012 16:07:04 +0000

Gazteluko alkateak, Mikel Bellosok, Maria Albizu Irizar bizilaguna zoriondu du gaur goizean, udalaren izenean. Izan ere, Albizuk 103 urte betetzen ditu gaur. Umoretsu hartu du alkatea, eta sasoi betean dagoela eta burua argi duela erakutsi du. Albizu Leaburun jaio zen, baina ezkontzean Gaztelura joan zen bizitzera.

Bide Ertzean taldea, Gaztelun

Ibarraldeko Hitza — Mon, 14 Nov 2011 15:06:32 +0000

Azaroaren 5 eta 6ko asteburuan, Gaztelun Asteburu Kulturala ospatu zuten. Uholdeak izanagatik, egitaraua aurrera ateratzea lortu zuten gainera herritarrek. Bertako produktuen azoka, hamaiketakoa eta jubilatuen bazkaria izan zituzten igandean. Aurreko egunean berriz, haurrentzat magoa eta jolasak, iluntzean afaria eta tartean, Bide Ertzean taldearen kontzertua. Gazteluarren esanetan, giro ederra izan zuten, eta parte hartu zuten guztiei eskerrak eman nahi izan dizkie antolatzaileek.

Prezio tasatuko sei etxebizitza eraikiko dituzte

Ibarraldeko Hitza — Wed, 26 Oct 2011 15:45:32 +0000

Herriaren erdian, plazaren ondoan bi bizitzadun hiru etxe eraikiko ditu Udalak. Prezio tasatuko etxebizitzak izango dira, eta 2013 urtearen hasierarako bukatuta egongo dira.
Sei etxebizitza horietatik bi esleituta daude dagoeneko, beraz, lau dira Udalak zozketatuko dituenak. Etxebizitza hauek jabetza erregimenean eskuratuko dira, eta familia unitatearen ohiko etxebizitza izateko erabili beharko dira.
Etxebizitza bakoitzak behe oina goiko, oina eta garajea izango ditu. Azalera erabilgarria 89,81 m2koa izango da, eta garajearena, berriz, 21,78m2. Horrela egongo da etxebizitza banatuta: Behe oinak sarrera, halla, banatzailea, sukaldea, jangela eta egongela eta bainugela izango ditu, eta goiko oinak banatzailea, hiru logela bainua eta balkoia. Eraikinaren azalera 233,56 m2koa izango da.
Etxebizitza bakoitzaren salneurriari dagokionean, 240.404,85 eurokoa izango da, BEZa barne, eta esleipendunek hiru ordainketa egingo dituzte.
Zozketan parte hartzea
Prezio tasatuko etxebizitza hauen zozketan parte hartu ahal izateko baldintza batzuk bete beharko dira. Eskatzaileak adinduna izan beharko du, eta Gaztelun edo Tolosaldean egon beharko du erroldatuta. Eskaerarekin batera, 12.000 euroko behin-behineko fidantza jarri beharko da, eta unitate eskatzaileak 35.000 euroko edo gutxiagoko diru-sarrera haztatuak jaso beharko ditu. Eskatzaileek ezin izango dute inongo etxebizitzaren jabe izan. Baldintza hauek guztiak egiaztatzeko dokumentazioa gutunazal batean aurkeztu beharko dute Gazteluko udaletxean.
Eskaera horriarekin, eta baldintzak egiaztatzeko dokumentazioarekin batera aurkeztu beharreko guztia udaletxeko idazkariak zehaztuko du.
Hala, udalak behin-behineko zerrenda egingo du aurkeztu direnekin. Zerrenda hori udaletxeko iragarki-taulan egongo da hamabost egunez erreklamazioak aurkeztu ahal izateko. Ondoren, alkateak, hirigintza zinegotziak, udal arkitekto-aholkulariak eta idazkariak osaturiko mahaiak erreklamazioak aztertu, eta behin betiko onarpena emango dio zerrendari. Era berean, eskatzaileen arteko zozketa egiteko eguna eta ordua zehaztuko dituzte.
Zozketa publikoa izango da, eta udaletxeko batzar aretoan egingo dute. Etxebizitzarik egokitu ez zaien eskatzaileak suertatzen diren ordenaren arabera, itxarote-zerrendan sartuko dira. Etxebizitza egokitu zaienek 15 eguneko epean esan beharko dute onartzen duten edo uko egiten dioten.
Zozketaren inguruko informazio gehiago nahi duenak udaletxeko idazkaritzara jo dezake.

Uda jolasean igarotzeko modu ona

Ibarraldeko Hitza — Mon, 18 Jul 2011 09:59:15 +0000

Udan ez aspertzeko, eta jolasean igarotzeko aukera bikaina dira herrietan antolatu dituzten udalekuak. Urtero bezala, Gazteluko udalak ere udaleku irekiak antolatu ditu, eta bertan herriko 11 umek hartzen dute parte. Pasa den astean, hilaren 14 eta 15an Orioko aterpetxera joan ziren bi egun pasatzera, Leaburu – Txaramako haurrekin batera. Hilaren 7an, berriz, San Fermin egun ospatu zuten, eta Erroizpe Azpiko kirol eta kultur elkartean bazkaria eder bat egin zuten.

Ikasturte amaierako yoga saioa

Ibarraldeko Hitza — Wed, 08 Jun 2011 17:39:35 +0000

Urtean zehar, Gaztelu eta Orexako herrietan, yoga ikastaroak jaso dituzte. Ikasturteari amaiera emateko, Gaztelun yoga saio bat egin zuten bi herrietako ikasleek. Horren ondoren afaria egin zuten elkarrekin Erroizpe Azpiko kirol eta kultur elkartean.

Ibarraldeko herritarrek bozka emateko aukera dute jada

Ibarraldeko Hitza — Sun, 22 May 2011 07:00:11 +0000

Oraintxe ireki dituzte ere Ibarraldeko herrietako hauteslekuak. 20:00ak arte egongo da udal eta foru hauteskundeetan bozkatzeko aukera. Hauek dira herriz herri aurkeztu diren alderdien zerrenda:

Belauntza: PP, PSE-EE, Belauntza Berreginez, eta Denok Bat.

Berastegi: PP, PSE-EE eta Bildu.

Berrobi: PP, PSE-EE, Giroa eta Bildu.

Elduain: PP eta Bildu.

Gaztelu: PP, Udaberri Taldea, eta Bildu.

Ibarra: PP, PSE-EE, EAJ, Bildu eta Hamaikabat.

Leaburu: PP, Bildu, eta Bide Berriak.

Lizartza: Bildu, Ertza eta PP.

Orexa: PP eta Bildu.

‘Hala bazan’ antzerkia Gaztelun

Ibarraldeko Hitza — Fri, 13 May 2011 16:04:59 +0000

Bihar, larunbata, Hala Bazan antzerkia egongo da Gaztelun. Antzerkia eskola zaharrean izango da, 17:30ean. Antzezlea Rosa Martinez izango da. Ondoren, merienda egingo dute Erroizpe Azpiko Kirol eta Kultur Elkartean.

Gauean, San Isidroko egingo dute urtero bezala, 20.30ean. Hau ere kultur elkartean izango da.

Gazteluko kultur etxearen aferan inputatuei elkartasuna agertu diete

Tolosaldeko eta Leitzaldeko Hitza — Sat, 07 May 2011 17:13:42 +0000

Gazteluko ezker abertzaleak antolatutako gaurko Elkartasun Eguneko bertso bazkarian 50 bat lagun bildu dira. Lehenago hala ere, sagardo dastatzea izan dute frontoian, eta bazkaldu aurretik elkarretaratzea ere egin dute plazan. Bertso bazkarian Maialen Lujanbio eta Iker Zubeldia izan dira, eta bertsoak entzutearekin batera, kultur etxeko afera gertatu zeneko argazkiak ikusteko aukera izan dute bertaratutakoek. Elkartasun Eguna orain 12 urte herrian izandako kultur etxearen aferan inputatutakoei babesa agertzeko antolatu dute.

Elkartasuna adierazteko eguna antolatu dute

Ibarraldeko Hitza — Thu, 05 May 2011 15:47:14 +0000

Gazteluko ezker abertzaleak Elkartasun eguna antolatu du, larunbaterako. Gazteluko kultur etxean izan ziren arazoen ondorioz, oraindik inputatuta dauden 12 lagunei eta bost langile kaleratuei elkartasuna adieraztea izango da helburua.
Horretarako, goizean hainbat ekitaldi antolatu dituzte. Nahiz eta, bazkalostean ere festarekin jarraituko duten.
12:30ean emango diete hasiera elkartasun egunari, herriko plazan egingo duten sagardo dastaketarekin. 13:30ean elkarretaratzea egingo dute, leku berean.
14:00etan, berriz, denak kultur etxean egingo den bertso bazkarira joango dira. Bazkalostea girotzen Maialen Lujanbio eta Iker Zubeldia bertsolariak ariko dira.

Gazteluko kultur etxearen kasuan inputatutakoei elkartasuna adieraziko diete

Ibarraldeko Hitza — Mon, 18 Apr 2011 15:36:13 +0000

Gazteluko ezker abertzaleak Elkartasun eguna antolatu du, maiatzaren 7rako. Gazteluko kultur etxean izan ziren arazoen ondorioz, oraindik inputatuta dauden 12 lagunei eta bost langile kaleratuei elkartasuna adieraztea dute helburu.
Kultur etxearekin izandako gorabeherak orain dela 12 urte hasi ziren. «Kultur alorrean zeuden gabeziei aurre egiteko kultur gune bat sortzea» izan zen kultur etxea sortzearen helburua. «Herri txikien hilzoria kasua, Gazteluren gainbehera eta hustuketa muturreraino iritsi baino lehen» herritarrei zerbitzu gehiago eskuragarri ipini nahi izan zitzaizkien: umeentzako liburutegia, ikastaro anitzak, baserritarren ekoizpen gune bat, eta hainbat lanpostu sortzea. Horrez gain, kultur etxeak aterpetxe, jatetxe eta taberna funtzioak ere betetzen zituen. Autofinantzaketaren bidez, «urteko 35 milioi pezeta inguruko fakturazioa zuten» ezker abertzalearen hitzetan. Eta, gainera, Eusko Jaurlaritzarekin adostuta,urtean, «17.000 haurrei euskara eta natura maitatzeko bidea» ematen zieten. Euskal Herrian horrelako proiektu bat martxan jartzen zen lehen aldia zelarik.
Kultur etxearen itxiera
1999ko abuztuan, ezker abertzalearen esanetan «bizirik eta osasuntsu» zegoen kultur etxea itxi zuten. Beraiek, urteak pasa ondoren, arrazoi nagusi bat ikusten dute: «erabaki politiko baten barruan» jokatu izana.Ezker abertzalearen ustez, «EAJ-k ezin zuen jasan Gaztelun, zein eskualdean, ezker abertzalea udalgintza mailan burutzen ari zen lana». Are gehiago, beraien hitzetan «EAJ-k izugarrizko interes politiko nahiz ekonomikoa azaldu zuen, eta dinamika hori aurrera eramateko, denak balio izan zion».
Kultur etxea martxan zegoela EAJ-k «toxikazio kanpaina izugarria jarri zuen martxan, komunikabide guztietan, gezur eta akusazio faltsuetan oinarrituz». Garai horretan, «Gaztelun EAJ, Gazteluko Herritarrak izenarekin alkatetzara iritsi zen. Juan Aranzabe, Rosa Gabirondo, Jose Mari Goikoetxea eta Miguel Aurkia zinegotzi zirela». 4 urte beranduago, 1999ko irailaren 30ean kultur etxeko 5 langilek «kaleratzeko eskutitza jaso zuten». Langileek kaleratzearen aurkako errekurtsoa epaitegietan jarri zuten, eta ebazpena iritsi bitartean, protestaldiak egiten hasi ziren. Egoerari irtenbidea eman nahian, langileek hainbat proposamen egin zituzten udaletxean: «kultur etxea enkantean ateratzea, edo garai hartan zituen langile kopurua murriztuz, gestioa udalaren menpe hartzea», besteak beste.
Langileak 5 hilabete luzez karabana batean bizi izan ziren, beraien lan eskubideak defendatzeko. Eskualde mailako mobilizazioek ere, «erantzun zabala» eduki zuten ezker abertzalearen ustez; eta hainbat eragileren babesarekin elkarretaratzeak, manifestazioak, eta abar antolatu ziren. Azkenean, Donostiako epaitegiak «5 langileei arrazoia eman eta udalak langileak kalera bidaltzea bidegabekeria izan zela onartu zuen». Are gehiago, «epaiak langileek erabateko defentsa eza jasan zutela azpimarratzen du, udalak aurkeztutako txostenetan langileek galarazita eduki zutelako beraien argibideak ematea». Epaiak udaletxeari bi aukera eman zizkion, «langileak kondizio berberekin berriz hartzea» edo «kalte galeren ordainketa burutzea». Langileek «beraien prestutasuna adierazi zien udalari, akordio batera ailegatzeko. Baina, udaletxearen erantzuna komunikabideetara gezurrak bidaliz eta toxikazio kanpaina areagotuz, langileei kalte ordainak ordaintzea» izan zela dio ezker abertzaleak. Hauen esanetan, garai hartako alkatearen hitzak «esanguratsuak» izan ziren. Honela gogoratu ditu ezker abertzaleak: «Juan Aranzabek langile horiek kultur etxean lanean ikusi baino, ijitoak nahiago zituela ikusi esan zuen, hitzez hitz».
Langileekiko elkartasuna areagotzean, presio polizial eta judiziala «areagotu» egin zen. 25 lagun auziperatuak izan ziren, eta elkartasuna adierazteagatik gaur egun 12 lagunek inputatuta jarraitzen dute. Hauek «kartzela zigorrak eta isun ekonomikoak ordaintzera derrigorturik daude». Kultur etxeak burutzen zituen zerbitzuak eraso «bortitz» honen ondorioz, «zapalduak» izan dira. Eta, ezker abertzalearen ustez, «kultur etxea ixtearen errudunak», 12 urte daramatzate «inongo esplikaziorik eman gabe».
Elkartasun eguna
Guzti hau dela eta, ezker abertzaleak Elkartasun eguna antolatu du, maiatzaren 7rako. Egun guztiko festa izango da. 12:30ean sagardo dastaketa egingo dute. 13:30ean elkarretaratze bat egingo dute herriko plazan. Eta, azkenik, 14:00etan bertso bazkaria egingo dute kultur etxean, Maialen Lujanbio eta Iker Zubeldiarekin. Txartelak maiatzaren 2rako erosi behar dira, Raku eta Zubiaurre tabernetan.