Ibarraldeko Hitza » Berrobi

«Bidaiak intentsoak izateko ez dute zertan atzerrian izan beharrik»

Ibarraldeko Hitza — Wed, 01 Feb 2012 23:01:58 +0000

Bidaiatzea oso gustuko du Agurtzane Belauntzaranek. Baita bidaietan bizitakoa paperean kontatzea ere. Eta eginkizun horretan trebea dela esan daiteke, Berria egunkariak antolatzen duen bidaien kontakizun lehiaketan lehen saria eman baitzuen 2009an, eta bigarren saria 2010ean. Mikel Esseryren oroimenezko bidaien kontakizun lehiaketan aurkeztu zen pasa den urtean estreinakoz, eta hor ere saritua izan da bere lana. 89 lagunek hartu dute parte lehiaketaren azken edizioan, eta epaimahaiaren ustez Esseryren bidaia filosofiarekin gehien bat egin duten 25 kontakizunekin Mambo Poa 3 liburua osatu dute. Kontakizun horien artean abenturazale berrobitarrarena dago.

Agurtzane Belaunzaran

Zein izan da lehiaketara aurkeztu duzun kontakizuna?
Afrika minez. Hitz joko bat da Afrika minez bizi delako, eta aldi berean Afrikak maitemintzen duelako. Malawin eta Mozambiken 2010ean bizitako esperientzia kontatzen dut kontakizun honetan. Bi hilabetez izan nintzen bertan. Bidaia osoa garraiobide publikoa erabilita egin genuen, uneoro afrikarrekin egon ginen, elkar ezagutzen eta eurekin erlazionatzen. Oso intentsoa izan zen, eta hori guztia kontatzen dut.
Hori da, hain zuzen irabazi berri duzun lehiaketaren filosofia, ezta?
Mikel Essery bidai gida zen. Pertsonengana gerturatu, eta kultur aniztasuna ezagutzeko irrika zuen. Orain dela lau urte hil zuten Yemenen atentatu batean, eta ordutik antolatzen dute bere omenezko lehiaketa hau. Lehiaketaren helburua bere filosofiarekin bat egiten duten kontakizunak saritzea da. Edonork har dezake parte, eta bidaiak edozein era eta lekutakoak izan daitezke. Afrikan nire bidaiaren moduan, edota Euskal Herrian bertan, saritua izan den Leitzaranen inguruko bidaia bezala. Bidaiak intentsoa izateko ez baitute zertan atzerrian izan beharrik. Kasu honetan, lehiaketaren irabazlea Lili Villanueva argentinarra izan da. Bere La llave del paraiso lanean Iranen egindako bidaia kontatzen du.
Zer sentitu zenuen zure kontakizuna aukeratua izan zela esan zizutenean?
Poza. Oso sari polita da zuk idatzitako zerbait liburu batean argitaratzea. Bizitzan egin beharreko gauzetariko bat liburu bat idaztea omen da, eta hori behintzat egin dut. [kar, kar]
Bidaiatzen ari zarenean beti idazten al duzu?
Kazetaria naiz, eta ez dakit horregatik izango den, baina egunerokoa idazteko ohitura handia dut bidaiatzen ari naizenean. Agian ez dut egunero idazten, baina bai maiztasun batekin. Bidaia horretan bizitakoak gordeta geratzeko eta geroago oroitzeko balio dit. Argazkiekin batera, hauek ere oso baliagarriak baitira horretarako.
Nora egingo duzu hurrengo bidaia?
Oraindik ez dakit ziur. Asko bidaiatu dut, baina leku asko falta zaizkit ezagutzeko. Esaterako, ez Ozeanian ez eta Asian ez naiz izan. Agian hurrengo urtean Asiara joango naiz. Hegoamerika eta Afrika ikaragarri gustatzen zaizkit. Asiaren kasuan, hizkuntza da nolabaiteko oztopo edo traba. Niretzat oso garrantzitsua da bidaiatzen ari naizen lurraldeko jendearekin hitz egitea, eta horregatik funtsezkoa da bertako hizkuntza jakitea. Beraz, nire ingeles apalarekin moldatu beharko dut Asian. Probatu egin nahi dut, eta orduan idatziko dut bertan bizitakoaren kontakizuna.

Babarrun jaterako txartelak erosteko azken eguna da gaur

Ibarraldeko Hitza — Wed, 25 Jan 2012 08:36:39 +0000

Larunbatean babarrun jatea egingo dute Begi Gorri gaztetxean. Txartelak zazpi eurotan daude salgai helduentzako, eta hiru eurotan umeentzako. Ondoren mus txapelketa egingo da eta gauean Donostiako Ekilibristak taldeak kontzertua emango du. Txartelak Iriarten eta herriko dendan eros daitezke eta gaur da azken eguna horretarako.
Bestalde, Berrobiko Udaletik gogorarazi dute saharar herriarekin bat egiteko kanpaina abian dela. Produktuak eta eskola materiala herriko dendan eta udaletxean biltzen ari dira eta horretarako azken eguna ostirala da.

Auzolanerako deia luzatu du nekazari berri batek

Ibarraldeko Hitza — Fri, 20 Jan 2012 06:14:44 +0000

Urtarrileko azken bi igandeetarako auzolanerako deia egin du Iñaki Bera, nekazari berriak. Negutegian laguntzea nahi du, eta Barazki bizidunak da bere negutegia. Igandean bere negutegira gerturatzea nahikoa izango da.

Kalean da urtearen errepasua egiten duen herriko aldizkaria

Ibarraldeko Hitza — Tue, 27 Dec 2011 23:00:32 +0000

Urtearen ondarrean gauden honetan, atzera begira jarri, eta urteak eman duena gogoratzea ohikoa izaten da. Asko dira, halaber, lan hori errazten duten argitalpenak, izan ere, herrietako, eskualdeetako, lurraldeetako edota gai jakin bateko urtekari ugari kaleratzen dira garai hauetan. Horietako bat da Berrobi Berri. Bere hamabigarren alea jaso dute Berrobiko herritarrek, eta bertan herrian aurten gertatutakoak irakurri ahalko dituzte.
Hamar lagunek osaturiko lantaldeak egiten du aldizkaria. Aurtengoan herriko bi baserritan nekazaritza ekologikoa landuz egiten duten lana nabarmendu dute. Era berean, natur baliabideak kontuan hartzen dituen Telleria nekazalturismoaren inguruko xehetasunak ere irakur daitezke.
Berrobin bada txakolina egiten duen baserri bat, eta bertako jabeari elkarrizketa egin diote. Halaber, 40 urteren ostean bere ateak itxi dituen herriko dendako arduradunen hitzak ere jaso dituzte. Udaleko bi udal taldeen proiektuak ezagutu ditzake irakurleak, urteko albisteak eta argazkiak ikusi, eta jaiotzak eta heriotzak gogoratu.
Gehigarri berezia
Bestalde, Berrobi Berri urtekariaren hamabigarren aleak gehigarri berezia gordetzen du barrualdean. Berrobiko memoria historikoa izenburupean, gerra ondorengo egoera gogorarazi nahi izan dute hainbat lekukori eginiko elkarrizketen eta ahotsak.com ataritik jasotako informazioaren bidez.

16 urte eta 8 hilabeteko zigorra, bere aitaordea hil zuen gazteari

Ibarraldeko Hitza — Mon, 26 Dec 2011 18:15:40 +0000

Epaileak jakinarazi du bere aitaordea Berrobiko etxola batean hil zuen gazteari jarritako zigorra: 16 urte eta zortzi hilabete. Azaroaren 14ean zinpeko epaitegiak hilketa eta lapurreta delituak egin zituela ebatzi zuen eta gaur jaso du epailearen ebazpena. Hilketa maltzurkeriaz egiteagatik jaso du 16 urteko zigorra eta lapurretagatik 8 hilabetekoa. 2009an hil zuen gazteak bere aitaordea mailu handi batekin burua joz. Zigortuak epaiketan esan zuenaren arabera, bere defentsan eman zion kolpea.
Hildakoaren bi semeetako bakoitzari 17.472 euro eman beharko dizkie, egindako mina konpontzearren. Hain justu, bi horiek zigortuaren anaiak dira, ama bera baitute.
Hilketaren gauean gertatutakoa azaltzen da epaian. Besteak beste, erasoa gertatu zenean, biktima makurtuta zegoela zehazten du, eta kolpeak ezustean hartu zuela, eta beraz, «ezin izan zen babestu». Epaileak gaineratzen duenez, biktima lurrean zegoenean, zigortuak 700 euro kendu zizkion eta bere autoa eraman zuen.

Frontenis Txapelketako finalak

Ibarraldeko Hitza — Tue, 06 Dec 2011 18:35:42 +0000

Berrobiko XX. Ion Ander Izagirre Frontenis Txapelketa azken puntura iritsi da. Gaur jokatu dituzte hirugarren eta laugarren postuetarako partidak, eta bihar, asteazkena finalen txanda izango da. 16:00etatik aurrera ondorengoek jokatuko dute: binaka Romero-Lobo eta Niko-Iker ariko dira; nesketan, Leire-Oihane eta Mireia-Arantzazu neurtuko dira, eta banaka, Romero Enekoren aurka. Ohiko sariez gain, hainbat opari zozketatuko dituzte antolatzaileek finalera agertzen diren parte hartzaileen artean.

Euskararen eguneko bazkariko txartelak salgai daude

Ibarraldeko Hitza — Wed, 23 Nov 2011 12:52:03 +0000

Abenduaren 3an Euskararen eguna ospatuko dute Berrobin. Egun guztiko festa izango da, eta bazkaria egingo dute. 25 euroren truke, txartelak salgai jarri dituzte herriko dendetan. Erosteko azken eguna, hilaren 29a, asteartea, izango da. Bazkaria 14:30ean izango da, eta txisteek eta bertsoek alaituko dute.

Hasi da Frontenis lehia

Ibarraldeko Hitza — Mon, 21 Nov 2011 15:57:08 +0000

Pasa den asteburuan hasi ziren Ion Ander Izagirre Frontenis Txapelketako partidekin. Gizonezkoetan 43 bikote eta banakako 32 lagun ariko dira. Emakumezkoek, berriz, bi bikote baino ez daudenez, abenduaren 7an jokatuko dute finala. Asteburu honetan partida gehiago izango dira, eta finalak hurrengoan jokatuko dituzte

Larunbatean hasiko dira entzuten Ion Ander Izagirre Frontenis Txapelketako pilotakadak

Ibarraldeko Hitza — Wed, 16 Nov 2011 17:07:35 +0000

Eskualdeko frontenis txapelketarik zaharrena larunbatean hasiko da jokoan, eta datozen hiru asteburuetan emakumezkoen eta gizonezkoen lehia bizia izango da. 20 urte betetzen ditu aurten Berrobiko Ion Ander Izagirre Frontenis Txapelketak, eta finkaturiko ekimena izaki, urtero bezala, harrera bikaina izan du.
Hain zuzen ere, gizonezkoetan, 43 bikote ariko dira, eta banaka, berriz, 32 lagun. Pasa den urteko parte-hartze kopuru beretsua izango du aurtengoak, beraz, iaz 40 bikote eta 35 banakako aritu baitziren.
Ezin gauza bera esan emakumezkoen parte-hartzeari dagokionez. Bi bikotek baino ez dute izena eman txapelketarako. Hauek finala jokatuko dute zuzenean, abenduaren 7an, 17:00etan.
Gizonezkoen kasuan, banaka zein binakako erako sailkapen partidak larunbat eta igande honetan eta hurrengo asteburuan jokatuko dituzte, goizez zein arratsaldez. Final-laurdenak abenduaren 3an jokatuko dituzte, binakakoak goizean eta banakakoak arratsaldean. Partida horietan erabakiko dira hurrengo egunean, hau da, abenduaren 4an jokatuko diren finalaurrekoak. Hemen ere, binakakoak goizean ariko dira, eta banakakoak arratsaldean. Partida horietan galtzaile direnek, hirugarren eta laugarren posturako partidak abenduaren 6an jokatuko dituzte, 10:00etan hasita. Irabazleek, berriz, abenduaren 7an, arratsaldez, jokatuko dute finaleko partida. Binakakoak 16:00etan ariko dira txapela irabazteko lehian, eta banakoak 18:00etan.
Txus eta Elenek osaturiko bikoteak irabazi zuen iazko txapelketa, nesken kategorian. Mutiletan banaka Mikel Goitia izan zen txapelduna, eta binaka Xabi Romero eta Eduardo Lobo bikoa.
www.izagirrefrontenistxapelketa.com webgunean egingo dute antolatzaileek txapelketaren jarraipena. Bertan daude ikusgai, esaterako, parte hartzaileen zerrendak, partidetako ordutegiak edota iazko txapelketako argazkiak.
Antolatzaileak «gustura»
Frontenis Txapelketako antolatzaileak «pozik» daude ekimenak urtero duen harrera onarekin. «Egonkortu egin dela txapelketa esan daiteke, eta hori gustura egoteko modukoa da». Hori bai, penaz agertu dira aurten emakumezko gutxi animatu direlako.

«Oso gustura nago egin dudan denborarekin»

Ibarraldeko Hitza — Mon, 14 Nov 2011 18:24:41 +0000

Ion Alberdi (Berrobi, 1983), eskualdeko bigarren gizonezkoa izan da Behobia-Donostia lasterketan. Eskualdeko lehen mutila Joseba Jauregi izan da, 1:10:37ko denborarekin. Alberdik 1:11:19ko denbora egin du, orain arte egin duen markarik onena. Sailkapen orokorrean hirurogeita hemeretzigarren postua lortu du.
Zer moduzko lasterketa egin zenuen?
Nahiko ondo. Nahiz eta haizea eta beroa egiten zuen, nik uste baino hobeto joan zen. Hala ere, hasieran gustura hasi nintzen arren, azkenerako nahiko justu iritsi nintzen. 1:10eko denboran sartu nahi nuen, baina ezin izan nuen. Hala ere, oso gustura nago egindako denborarekin.
Orokorrean jendea ez da gustura gelditu eguraldia dela eta.
Nik nahiago izaten dut eguraldi beroa, euria eta hotza baino. Adibidez, ni lehengo urtean euriarekin ez nintzen batere gustura ibili. Bukaeran, nahi nuen denboran sartzeagatik, esfortzu gehiago egin eta nahiko justu ibili nintzen, baina bestela ondo.
Zenbat aldiz parte hartu duzu lasterketa honetan?
Nire izenean parte hartu dudan bigarren urtea izan da. Orain dela hiru urte beste pertsona baten dortsalarekin parte hartu nuen.
Eskualdeko bigarren gizonezkoa izateak zer suposatzen du zuretzat?
Nik gehienbat marka ontzea nuen helburutzat. Berrobin ere Jose Luis Zabalak 1:11:56ko marka jarrita zuen, duela 12 urte ingurutik, eta nire helburua hori jaistea zen.
Gustura zaude egindako lanarekin?
Bai. Urtero denbora jaisten badut gustura egongo naiz. Nahiz eta hemendik aurrera zaila izango den denbora jaistea.
Zer garrantzi ematen diozu Behobia-Donostia lasterketari?
Niri beste lasterketa batzuk gehiago gustatzen zaizkit, baina, Behobiak duen ospeagatik atera egiten naiz.
Zer moduzko lasterketa da?
Jendetza handia ateratzen da, eta horietako asko batere prestatu gabe ere bai. Lasterketa famatua izan arren, aurretik ondo prestatzea komeni da.
Eta antolakuntza aldetik?
Antolakuntza ona da. Ura, esate baterako, leku askotan jarrita zegoen, eta igandean beharrezkoa zen egiten zuen beroarekin eta haizearekin, gorputza asko deshidratatzen baitzen.
Jendearen animoek ere lagunduko dute, ezta?
Alde horretatik, oso lasterketa ona da. Jende asko ateratzen da animatzera, eta horrek beste laguntza bat ematen dizu lasterketan aurrera egiteko.
Zer da Behobia-Donostia lasterketako gogorrena?
Aldapak. Mirakruzeko azkeneko aldapa oso gogorra da; ahal bezala igo, eta bukatzeko gogoz egoten baitzara.
Lasterketa hau prestatzeko zerbait berezia egin duzu?
Bizikletan ibiltzea asko gustatzen zait eta uda osoan horretan aritu naiz. Uda amaieran, Berrobiko festetan, herriko krosean ateratzen naiz. Hortik aurrera, bereziki korrika prestatzen naiz Behobia-Donostiarako.
Beste lasterketa batzuetan parte hartzen duzu?
Bai. Urte hasieran duatloietan parte hartzen dut, udan bizikletan ibiltzen naiz, udazkenetan krosetan aritzen naiz, eta neguan eskiatzera joaten naiz. Urte guztian aritzen naiz zer edo zertan.
Hurrengo urtean errepikatzeko asmorik ba al duzu?
Bai, inongo lesiorik ez badut behintzat ziur aterako naizela. Igandean lasterketa amaitu nuenean, nahiko justu ibili nintzenez gehiago aterako ez nintzela esan nuen. Baina, gero jendearen animoekin eta babesarekin, hurrengo urtekoan ateratzeko ilusioa berpizten zaizu.