Ibarraldeko Hitza » Berastegi

Kaleak alaituz inauterietan dabiltza, Berastegin eta Lizartzan

Ibarraldeko Hitza — Sat, 11 Feb 2012 18:46:35 +0000

Berastegi eta Lizartzara iritsi dira inauteriak. Tolosakoei aurre hartuta, dagoeneko mozorroak atera dituzte kalera.

Berastegin, txikienek mozorroak jantzi eta dantza emanaldia egin dute. Ondoren, txokolate beroa hartu dute. 19:00etatik aurrera triki-poteoa, eta eguna bukatzeko afaria izango dute.

Lizartzan goizean goiz hasi dira baserri eta kaleak girotzen. Gorputza mugituz, hotzari aurre egin diote. Besteak beste, bazkaria egin dute frontoian. Bihar ere inauteri eguna izango dute. Hamaiketakoa, dantza saioa, bazkaria herriko pilotalekuan, txaranga jokoak,… izango dituzte. Bukaera 20:30ean emango diote ijitoa errez.

Inauteriak izango dituzte Berastegin eta Lizartzan, asteburu honetan

Ibarraldeko Hitza — Wed, 08 Feb 2012 23:01:08 +0000

Leitzakoak izan ziren goiztiarrenak, eta euren lekukoa aresoarrek hartu zuten. Orain, Berastegi eta Lizartzaren txanda heldu da. Tolosan Inauteriak gertu direla iragartzen duten kaldereroak ospatuko dituzten bitartean, berastegiarrak eta lizartzarrak mozorroen festan murgilduko dira asteburuan.
Lizartzan, dena den, iragan asteburuan ere izan zen zer ospatua. Izan ere, inauterien hasieraz ohartarazten duen diana etzi entzungo den arren, pasa den larunbatean urteroko antzerkiaz eta Otsolar dantza taldearen emanaldiaz gozatzeko aukera izan zuten herritarrek. Hain zuzen ere, Lizartzan jazotako gertakizun bat irudikatu nahi izaten dute antzerkiaren bidez. Txekorra apustuan jarri zuten karta jokoaren bidez, eta eztabaida txiki bat izan ostean, epaileak herritar guztien artean txekor jatea egitea erabaki zuen arazoa konpontze aldera. Istorio horixe antzezten dute herritarrek, eta horren ondotik, etorri ohi da herriko dantzarien saioa.
Bada, asteburu honetan, festarekin jarraituz, puske-biltzeak, txantxoak, gurdiak, Lizartzako Inaute dantzak… eta ijitoa izango dira, besteen artean.
Berastegin, inauterien itzulera
Aldin kultur elkarteak 2004an berreskuratu zuen inauteriak Berastegin ospatzeko ohitura. Lau urtetan egin zuten mozorroen jaia, baina «jendearen erantzuna gutxitzen joan zenez», azken hiru urteetan, ez dute inauteririk izan. Aurten, ordea, Urepele gazte elkarteak eta Udalak elkarlanean antolatuta, festa izango da berriro ere herrian. «Eratu berri den Urepele elkarteko batzorde berriak eta bertako kultur taldeak udaletxean proposamena egin zuen, eta horrela erabaki zen berriz ere antolatzea», azaldu du Amaia Azkue zinegotziak.
Bihar eta etzi ospatuko dituzte inauteriak, baina etzikoa izango da egun handia. Herri afaria eta ondorengo festa dira ekitaldi nagusiak. Badirudi herritarrak festarako irrikaz daudela, afarian, esaterako, 114 lagun izango baitira. Antolatzaileek antolakuntzan herritarrek eskainitako laguntzen eskertu nahi izan dute.

Animaliak bedeinkatu dituzte euren zaindariaren egunean

Ibarraldeko Hitza — Tue, 17 Jan 2012 12:19:05 +0000

Urtero bezala, San Anton egunean, meza egin dute Berastegiko San Anton ermitan, eta ondoren, apaizak herritarrek eraman dituzten animaliak bedeinkatu ditu. Zakurrak, txakurkumeak eta oilar bat zeuden ermitaren atarian elizkizuna noiz bukatu zain bedeinkatuak izateko. Bedeinkapenaren ostean, hamaiketakoa hartu dute bertaratu diren guztiek.

«Adierazi nahi dudana ederki moldatzen da poesiara»

Ibarraldeko Hitza — Tue, 10 Jan 2012 23:01:21 +0000

Mungiako Udalak antolatzen duen Lauaxeta Poesia saria irabazi berri du berastegiarrak. Horrez gain, laster ikusiko du bere lehen poema liburuak argia, Elkar argitaletxearen eskutik. Poesia duela gutxi deskubritu zuen, eta bertan topatu du bere barnean duena aurkitzeko tresna.
Nolatan aurkeztu zinen lehiaketara?
Lehiaketa honetan aurkeztu naizen lehendabiziko aldia izan da. Poesia serioski idazten duela gutxi hasi naiz, eta lehiaketa honetara aurkeztuz, idazteko aitzakia bat nuen.
Nolako lehiaketa da Lauaxeta Poesia lehiaketa?
Mungiako Udalak antolatzen du sariketa. 2011koa laugarren urtea izan da. Lauaxetaren olerki baten izena hartzen dute, eta hori gai bezala erabili behar duzu poesia idazteko. Poesiaren luzera ere zehazten dute.
‘Itsasora!’ izan da aurtengo lehiaketarako proposatu duten gaia. Zer moduz moldatu zara?
Ondo, pentsatzen nuena baino errazagoa izan da. Gaia oso zabala da. Itsasoaz gauza asko idatzi izan da, eta poesian zer esanik ez. Nire kasuan, metafora bezala hartu dut itsasoa, eta jaiotzetik heritzera bitarteko bidaia modukoa egin dut. Azken aldian, heriotzaz eta bizitzaren zentzuaz ari naiz hausnarketa egiten, eta, itsasoa nire ideietara egokitu dut. ‘Itsaso ginen eta itsaso gara’ bezala osatu dut metafora, ‘lur ginen eta lur izango gara’ moldatuz. Hala, jaiotzetik edo itsaso ginenetik, hiltzeraino, itsaso izango gareneraino osatu dut olerki multzoa.
Zergatik heriotzaz idatzi?
Heriotza bertan dagoen gai bat da, baina askotan ezikusiarena egiten dugu. Nire ustez, bizitzak ez du zentzurik heriotzarik gabe. Azken batean, heriotza hemen dugu, eta txoko guztietan ikusten duzu. Literaturan betidanik erakarri izan naute heriotzaz ari diren lanek, eta poesian are eta gehiago.
Ze sari jaso duzu lehiaketa irabazteagatik?
Mungiako udalak bi lan irabazleak argitaratuko ditu bai sarean bai eta paperean ere. Horrez gain, garaikurra eta 800 euroko saria ere jaso dut.
Bigarren sari edo opari bat laster izango da kalean, ezta?
Poema liburu bat idatzi dut, eta Elkarrek argitaratuko du martxoan. Proiektu hau lehiaketa baino lehenagokoa da. Idazle Eskolak ematen duen Karmele Igartua beka irabazi nuen duela urte batzuk. Horren ondotik animatu nintzen idatzita nituen lanen aukeraketa eginez bilduma osatzera. Horrela egin nuen liburua, eta ondoren argitaletxera bidali nuen. Des-egiten izenburupean argitaratuko dute. ‘Deseginez egiten’ ideari jarraitzen dio. 80-90 orrialde izango ditu, eta 60 olerki inguru.
Zer gai ukitzen dituzu liburuan?
Olerki solteak dira. Bizitzaz, heriotzaz eta maitasunaz ari da. Izatearen inguruko poema sorta bat da. Poema solteak dira, baina euren artean lotura dutenak.
Olerki hauek irakurtzen dituenak Ione hobeto ezagutzeko aukera al du?
Neurri batean, bai. Poesia asko erabiltzen dut barruan dudana aurkitu eta ezagutzeko. Oso niretik idatzitako poesia dela esan daiteke.
Erraza egiten al zaizu hain zurea den zerbait kaleratzea?
Bai. Oso nirea den zerbait da, baina, aldi berean, ez ditut nire bizitzako xehetasunak kontatzen. Ez dut sekreturik azaltzen. Baina, ni ezagutzen nauena konturatuko da nire buruaz ari naizela, nire mamuak eta nire zalantzak azaleratzen baitira. Hori bai, beste norbaitek nire poesia irakurtzeak lotsatu egiten nau, ez zait gustatzen, oso nerea baita.
Nola izan da liburua idazteko prozesua?
Ez naiz denbora luzez paperaren edo ordenagailuaren aurrean idazten egotekoa. Esaterako, lagunekin kafe bat hartzen ari naizela ideia on bat etor dakidake, eta gorde egiten dut, gero etxean garatzeko. Zirriborro asko nituen horrela, eta guztiak batu eta txukuntzen lan handia izan dut.
Nondik datorkizu poesiarako zaletasuna?
Txikitatik asko irakurri izan dut. Orain hiru urte Idazle Eskolan hasi nintzen, eta han poesia idaztea egokitu zitzaidan. Hauek idazten oso eroso sentitzen nintzela konturatu nintzen. Nik adierazi nahi dudana egokiago moldatzen da poesiaren neurrira. Orduan, poesia gehiago irakurtzen hasi nintzen, olerkari desberdinen lanak gehiago ezagutzeko helburuz.
Olerkariren bat ba al duzu erreferentzi bezala?
Joseba Sarrionandia asko gustatzen zait, baita Karmele Igartua eta Leire Bilbao ere.
Liburu bat aukeratu beharko bazenu?
Poema liburuetan gehien markatu nauena Karmele Igartuaren Denbora enaren hegaletan izan da. Nire estiloarekin oso bat dator.

Berastegitik Andoainerako norabidean A-15 autobiderako sarrera ireki dute

Ibarraldeko Hitza — Thu, 05 Jan 2012 13:27:17 +0000

Berastegin, A-15 autobidean Andoaingo norabidean sartzeko bidea zabaldu dute. Gipuzkoako Foru Aldundiko Bide Azpiegitura eta Mugikortasun Departamentuak sarbide hori azaroaren hasieran itxi egin behar izan zuen, luizi arriskuaren ondorioz konponketa lanak egin ahal izateko. Lanek urtarrilaren 9ra arte iraungo zutela iragarri bazen ere, azkenean urtarrilaren 3an zabaldu ahal izan dute sarbidea. Izan ere, Foru Aldundiko teknikariek egindako jarraipenaren arabera, malda egonkortu egin da, eta horrexegatik hartu da lehenago irekitzeko erabakia.
Sarbidea itxita egon den bitartean, Berastegitik Andoainera joan nahi zuten erabiltzaileek Leitzan hartu behar izan dute A-15a.

Etiopia laguntzeko ekimena

Ibarraldeko Hitza — Tue, 27 Dec 2011 23:00:22 +0000

Muñagorri eskolako ingurumen batzordeak antolatuta, Elkartasun Azoka egin berri dute Berastegin. Antolatzaileak «oso gustura» daude izan duen harrerakin. «Oso pozik gaude, ekimenak zituen bi helburuak bete egin baitira». Azokaren lehen helburua erabilerarik ez zuen materialari berrerabilpena ematea zen, eta bigarren helburua, elkartasun izaera izatea. Herritarrek utzitako materialarekin 400 euro inguru bildu dute, eta hori aurreko urteetan bezala, Etiopiako Wukro herrira bidaliko dute. hitza

Muñagorri eskolak antolatuta, Elkartasun Azoka egingo dute

Ibarraldeko Hitza — Wed, 07 Dec 2011 18:03:14 +0000

Aurten ere, Muñagorri eskolako Ingurumen Batzordeak Elkartasun Azoka antolatu du abenduko hirugarren astebururako. Antolatzaileek diotenaren arabera, «bigarren eskuko materialen azoka honen helburua soberan edo erabiltzen ez ditugun gauzei etekina atera eta erabilpen berri bat ematea da».
Azokaren aurreko egunetan materiala jasoko dute. Arropa, jostailuak, liburuak edota altzariak utzi daitezke. Muñagorri eskolakoek erabili daitezkeen eta txukun dauden gauzak izatea eskatzen dute. Datorren astelehenetik ostegunera, hau da, hilaren 12tik 15era jasoko da materiala, aparkaleku azpiko lokalean 16:30etik 18:30era.
Ekartzen diren gauzei prezio sinboliko bat jarriko diete antolatzaileek.
Dirua, Etiopiara
Abenduaren 16, 17 eta 18an jarriko dute bildutako materiala salgai. Jasotzen duten dirua Etiopiako Wukro herrira bidaliko dute, urtero bezala.

Berastegiko A-15erako sarbidea itxita egongo da

Ibarraldeko Hitza — Mon, 28 Nov 2011 17:55:52 +0000

Gipuzkoako Foru Aldundiak Berastegin, A-15ean, eurite handiak izan zirela eta, luiziak izateko arriskua ikusi du. Horregatik, Berastegitik Andoainera norabidean A-15era sartzeko bidea itxi du.

Sarbide hori itxita egongo da 2012ko urtarrilaren 9ra arte. Ondorioz, Andoainera A-15 autobidea erabilita joan nahi dutenek Leitzan hartu beharko dute A-15a, hau da, Leitzako A-15eko lotuneraino GI-2130 errepidetik joan beharko dute.

Berastegitik Andoainera noranzkoan A-15era sartzeko bidea itxita jarraituko du

Ibarraldeko Hitza — Fri, 25 Nov 2011 14:36:44 +0000

Gipuzkoako Foru Aldundiak jakinarazi duenez, Berastegitik Andoainera noranzkoan A-15 autobiara sartzeko bidea itxita egongo da urtarrilaren 9a arte. Luizi arriskua dagoelako mantenduko dute itxita. Orain hiru bat aste itxi zuten, uholdeen ondorioz, eta orduan azaroaren 28a arte itxita egongo zela esan zuten, baina inguruan azterketa lanak egin ondoren, ikusi da oraindik arriskua badagoela, eta horregatik erabaki dute urtarrilaren 9a bitarte itxita mantentzea.

Bide mozketa honen ondorioz, A-15 autobidea erabilita Berastegitik Andoainera joan nahi duen gidariak Leitzan hartu beharko du A-15a, hau da, Leitzako A-15eko lotuneraino GI-2130 errepidetik joan beharko dute. Desbideratzen horiek guztiak egoko azaltzeko seinaleak jarrita daude.

Kultur asteari amaiera emateko Azoka Eguna, igandean

Ibarraldeko Hitza — Thu, 10 Nov 2011 16:23:23 +0000

Pasa den asteko ostegunean hasitako kultur astea ari da bukaerara ailegatzen. Azken ukitua ekitaldi handienak emango dio, igandeko Azoka Egunak, hain zuzen.
Asko dira egun honek dituen ezaugarriak. Batetik herriko produktuak ikusi, dastatu eta eskuratzeko aukera izango da. Bestetik, lehiaketa ugari izango dira, gaztarena nabarmendu daitekeelarik, 20. urtez egingo baita. Parte hartzaileek berastegiarrak behar dute izan, eta gazta norbere etxeko ardi-esnearekin egina.
Lehiaketa honetaz gain, Postu Lehiaketa, Argazki Lehiaketa, Animali Erakusketa, Ardi, Ahari eta Bildots Lehiaketa eta Baratze Lehiaketa ere izango dira. Guztien sariak eguerdian banatuko dituzte. Taloa eta gazta ardoa eta sagardoaren laguntzaz dastatuz bukatuko dute eguna.