2012/05/12
Subegi eguna antolatu dute maiatzaren 12rako. 12:00etan dultzaineroak izango dira, 14:30ean bertso bazkaria Xabier Silveira eta Alaia Martinekin, ondoren haur jolasak, eta 20:30ean hasi eta goizaldera arte Zea Mays, Hesian, DJ Bull, DJ Elepunto, Willis Drummond edota La Jodederaren musikaz gozatzeko aukera izango da Emeterio Arreseko frontoian. Bertan karpa jarriko dute, txosnak egongo dira, eta edatekoaz gain, ogitartekoak ere izango dira.
Bazkarirako txartelak (haurrek 6 euro, eta helduek 10) herriko tabernatan eskura daitezke. Kontzertuetarako sarrerak, berriz, aurrez eros daitezke 10 euroan, Ibarrako Karlatz, Subegi, Zubiaurre eta Atarin, Tolosako Denak, Raku, Meskal eta Eguzkin, Alegiako Ixkiñan, Anoetako Itzulin, Villabonako Iratzarren, eta Leitzako Torrean. Internet bidez, www.musikaze.com atarian jarri dituzte eskuragarri. Bietarako txartela nahi duenak 20 euroko bonua izango du eskura.
2012/05/11
Uraren kudeaketaren inguruko batzarra egingo dute ostiralean, hilaren 11n, 20:30etik aurrera, eskolako ganbaran. Hain zuzen ere, Gipuzkoako Urak-eko Iñigo Elosegi izango da bertan, eta Berastegiko egoeraz eta emango diren aldaketen inguruan azalpenak emango ditu. Berastegiko Udalak herritar guztiak gonbidatu ditu bilerara, eta «gaiak herrian duen garrantzia dela eta», ahalik eta jende gehien elkartzea espero du.
2012/05/10
Festa batzordearen bilkura izango da bihar, hilak 10, San Bartolome jaiak antolatzeari ekiteko. 19:30ean hasiko da bilera, Ibarrako udaletxeko batzar aretoan.
2012/05/07
Datorren astelehenean, hilaren 7an, herritarren mugikortasunaren inguruan bilera izango da Leaburuko Udalak deituta. Udaletxean egingo dute 20:00etatik aurrera, eta herritar guztiei egiten zaie bertan parte hartzeko eskaera. Izan ere, leaburuarrek autobusa eta beste garraiobideak erabiltzeko dituzten joerak eta hauen ordutegiak ezagutu nahi dituzte, «zerbitzuak hobetze aldera». Herritar oro, baina bereziki haur eta gaztetxoen gurasoak deitu nahi dituzte bilerara, hauek nola moldatzen diren jakin nahi baitute.
2012/04/29
Ibarrako Langostino moto elkarteak bira antolatu du datorren iganderako, hilaren 29rako. Ibarrako Erre-Berri dendatik irtengo dira 09:30ean, eta Tolosarantz abiatuko dira. Andoain, Lasarte, Uzurbil, Orio, Zarautz eta Zumaiatik igaroko dira, eta Itziarren geldialdia egingo dute hamaiketakoa egiteko. Deba, Lastur, Madariaga auzoa, Azkarate, Azkoitia, Azpeitia, Urraki edo Errezil, Tolosa zeharkatu, eta Ibarran bukatuko dute. Bazkaria Xepla elkartean egingo dute.
Hamaiketakoa nahi duenak 7 euro ordaindu beharko du, eta bazkarirako, berriz, 16 euro. Izena langostinomotofesta@gmail.com helbidean eman behar da.
2012/04/26
Hondakinak arazo jardunaldien barruan, Zero Zabor ekimenari buruzko hitzaldia izango da apirilaren 26an Elduaingo kultur etxean, 19:00etan, Zero Zabor taldeko Ainhoa Arrospideren eskutik.
Uzturpe Ikastolako DBH 3ko ikasleek, Hezkuntza Solidarioa proiektuaren barruan, gizarte sareen inguruko ezagutza zabaltzeko aurkezpen bat burutu dute. Lan hau Ibarrako kultur etxean, apirilaren 26an, 19:00etatik aurrera aurkeztuko dute jendaurrean. Sextinga-a, Grooming-a eta Ciberbulling-a moduko gaiak jorratu dituzte lan honetan.
2012/04/20
Leaburuko festak pixkanaka gerturatzen ari direnez, festak antolatzen hasteko, jai batzordea osatzeko lehen bilera egingo dute Leaburun. Etzi, ostirala, izango da bilera, 19:00etan gazte gelan. Udaletik herritar guztiak animatu dituzte bilerara joan eta jaien antolaketan parte hartzera.
2012/04/19
San Lorenzo festak antolatzeko bilera egingo du gaur jai batzordeak, udaletxean, 20:30ean hasita. Berastegiko Udalak herritar guztiak animatu nahi ditu bileran parte hartzera.
Berastegi eta bertsoa uztartu asmoz, bertso lagun arte bat martxan jarri nahi dute herrian. Horretarako, herriko bertsozale, bertsolari edota bertsolaritza jorratu nahi duten guztiak bilerara deitu dituzte. Gaur izango da hitzordua, aparkaleku azpiko lokalean, 20:00etan.
Tolosaldeko eta Leitzaldeko Hitza
Ibarraldeko Hitza
