2012/01/27
Zabalik dago Benito Izagirre kultur etxean pasa den urteko San Bartolome jaietako argazkiekin eginiko erakusketa. Martxoaren 2ra arte egongo da irekita, eta goizez, 10:30etik 13:00etara bitarte, eta arratsaldez, 15:30etik 21:00etarako ordutegian, bisitatu ahalko da.
Udaleko kultura sailak antolatutako ekimena izan da. Adierazi dutenaren arabera, 700 argazki inguruko bilduma osatu zuten iazko jaietan eta horietatik 300 inguru jarri dituzte ikusgai kultur etxean.
Gainera, nahi duenak gustuko duen argazkiaren kopia eskatzeko aukera ere izango du. Kopia bakoitzeko kostua 0,50 eurokoa izango da, eta eskuratzeko kultur etxeko harreran eskatu besterik ez da egin behar.
2011/05/03
Gaurtik aurrera, Ibarrako kultur etxean ikusgai dago Gipuzkoako Txirrindularitza argazki erakusketa. Kutxako Gizarte Ekintzak babestutako erakusketa hau bertan egongo da hilaren 20ra arte. Erakusketa bisitatzeko ordutegia: 10:30-13:00 eta 15:30-21:00.
Bilduma honetan gipuzkoarrek txirrindularitzarekiko duten zaletasuna argi eta garbi ikus daiteke. Gure herriak kirol jarduera honekiko duen interesa gogorarazten dute 95 argazki hauek. Bertan ohartuko gara kirol honi diogun zaletasunak bizirik segitzen duela gaur egun ere, baina era berean ikusiko dugu, denborak aurrera egin ahala, zenbait gauza aldatu egin direla.
2011/03/15
Ni ere pertsona erakusketa ikusgai dago asteartetik, Ibarrako kultur etxean. SOS arrazakeriak sortutako erakusketa da. Tolosaldea Garatzeneko Kristina Miralesek azaldu duen bezala, erakusketa «etorkinen errealitatea Ibarran bizi diren pertsonei gerturatzeko» da. Herrialde ezberdinetako pertsonen errealitatea, eta jatorrizko herriaren errealitatea azaltzen dute bertan ikus daitezkeen panelek. Martxoaren 21eko, Nazioarteko Arrazakeriaren Aurkako eguna izango da, eta ekitaldi horien baitan sartu dute erakusketa.
Tolosaldeko eta Leitzaldeko Hitza
Ibarraldeko Hitza
